«Карабель мерцвякоў». У Атлантычным акіяне сустрэлі лодку, поўную трупаў
Нямецкі падарожнік Міхаэль Атуг з двума сябрамі сабраўся праплысці на яхце ад Канарскіх астравоў каля ўзбярэжжа Афрыкі да Гвадэлупы ў Карыбскім моры. Але не разлічваў, што ў акіяне наткнецца на такую страшную знаходку, піша Bild.
На 11-ы дзень падарожжа кампанія сяброў выявіла на першы погляд пустую драўляную лодку — такую, якія выкарыстоўваюць рыбакі каля ўзбярэжжа Сенегала. Незвычайным, аднак было тое, што ад яе ішоў моцны пах мярцвечыны. Акрамя таго, мужчыны пабачылі каля лодкі акулу.
«Усё дно васьміметровай, цяжкой, старой драўлянай лодкі было завалена мёртвымі целамі. Мужчынамі, жанчынамі і, магчыма, дзецьмі. Карабель мерцвякоў. Цяжка сказаць, колькі іх было. Відаць, яны памерлі ад спёкі, голаду і смагі самым жахлівым чынам», — сказаў Атуг у размове з Bild.
Яхтсмены мяркуюць, што судна ішло з Заходняй Афрыкі на Канарскія астравы. На такіх лодках часта размяшчаюцца не менш за 50 бежанцаў.
«Яны змагаліся за сваё жыццё да канца. Ніхто не заслугоўвае падобнага. Спадзяюся, калі-небудзь нелегальныя перавозчыкі мігрантаў атрымаюць за гэта справядлівае пакаранне», — дадаў Атуг.
Падарожнікі з Германіі звярнуліся ў іспанскую берагавую ахову, але там не сталі буксіраваць судна. Пасля адгукнуліся сенегальскія ўлады, але яны таксама не аказалі ніякай дапамогі. Лодка з трупамі, відаць, так і застаецца ў адкрытым акіяне.
Галоўным спікерам Жаночага форуму ў Мінску стане расійскі крынджовы псіхолаг, які расказваў пра «памяць жаночых палавых губ»12
Каментары