У Гомелі скульптуру Гулівера заменяць на скульптуру ратавальніка
У Гомелі знікла знакамітая скульптура Гулівера, якая каля дваццаці гадоў аздабляла парк з дзіцячым гарадком на рагу Рэчыцкага праспекта і вуліцы Сасновай і была візітоўкай гэтага месца, піша гомельскае выданне «Белка».
Рэч у тым, што цяпер тут ідзе ўладкаванне сквера Ратавальнікаў, таму замест Гулівера паставяць іншую скульптуру — ратавальніка з дзіцём на руках вышынёй у 3,5 метра без уліку пастамента.
Таксама ў скверы з'явяцца алеі з паркавымі і стылізаванымі лаўкамі ад МНС, дзіцячай гульнявой пляцоўкай, кавярняй і паркоўкай.
Зрэшты, Гулівера на сметнік таксама не выкінуць. Гэтую скульптуру цяпер адправілі на рэстаўрацыю, а пасля паставяць у парку «Фестывальны».
Як высветліла «Белка», Гулівер цяпер знаходзіцца на адной з пляцовак прадпрыемства «Кірмаш». Там стальную канструкцыю ачысцяць ад іржы і пафарбуюць. Асаблівай увагі патрабуюць ногі волата. Метал у гэтай частцы заменяць, а да асновы прыварыць метровыя апоры, якія пры мантажы на новай пляцоўцы забетануюць.
Каментары