Праўладны аналітык, які служыў у расійскай вайсковай разведцы: У мяне дача літаральна за 5 км ад Сувалкаўскага калідора
Пастаянны ўдзельнік «Клуба рэдактараў» на БТ аналітык Аляксей Аўдонін навёў страху на прысутных, расказаўшы пра агрэсіўныя намеры Польшчы.
Выступаючы ў чарговым эфіры «Клуба рэдактараў», Аляксей Аўдонін расказаў пра планы Польшчы пашырыць Сувалкаўскі калідор на 133 кіламетры да Іўя — каб заблакіраваць Калінінградскую вобласць і ў далейшым усё Балтыйскае мора, не даць выхаду Балтыйскаму флоту ў мора і потым «далей бамбіць Кранштат». Пры гэтым Польшчу, па словах аналітыка, падтрымліваюць ЗША.
У якасці пацвярджэння гэтай версіі ён прывёў прыклад вучэнняў НАТА:
«Паглядзіце па відэа, якая аграмадная колькасць амерыканцаў. Што яны там робяць у гэтым Сувалкаўскім калідоры? Зразумела, што яны адпрацоўваюць механізмы яго пашырэння. Вывучаюць мясцовасць».
У сваіх развагах Аўдонін пайшоў яшчэ далей, пачаў расказваць, што тэма пашырэння Сувалкаўскага калідора пастаянна абмяркоўваецца ў польскіх СМІ, і нечакана прызнаўся, што ў яго на памежжы ёсць дача:
«У мяне дача літаральна за пяць кіламетраў ад Сувалкаўскага калідора. Там пастаянна, слухайце, уключаеш радыё — дагэтуль пастаянна ідзе польскае радыё, вяшчае, — і тэма толькі адна».
Аляксей Аўдонін нарадзіўся ў Гродне ў, як ён сам неаднойчы адзначаў, сям'і ветэрана Вялікай Айчыннай вайны. Бацьку, ураджэнцу Масквы, на момант нараджэння сына было 57 гадоў.
Аўдонін пазіцыянуе сябе як магістра эканамічных навук, эксперта Беларускага інстытута стратэгічных даследаванняў. Акрамя Беларускага эканамічнага ўніверсітэта, мужчына вучыўся на ваеннага перакладчыка ў Лінгвістычным універсітэце. Аўдонін раней прызнаваўся, што служыў у ваеннай разведцы Галоўнага ўпраўлення Генштабу Расіі (ГРУ). У сваёй афіцыйнай біяграфіі згадвае навучанне ў Венгрыі і Швейцарыі.
Пра тое, што Польшча сумесна з Вашынгтонам і Лонданам рыхтуе вайну на тэрыторыі Беларусі, Аўдонін гаварыў яшчэ восенню 2022 года.
На Шры-Ланцы ў 37 гадоў памёр беларускі кінапрадзюсар Андрэй Маталыга4
Каментары