Сёння беларускія школы і гімназіі пачынаюць прыём дакументаў ад бацькоў будучых першакласнікаў, паведамляе БелТА.
Прыём дакументаў для залічэння ў 1-я класы дзяцей, што пражываюць на тэрыторыі мікрараёна, замацаванага за ўстановай адукацыі, ажыццяўляецца з 12 чэрвеня па 15 жніўня.
Бацькі будучых першакласнікаў падаюць заяву на імя дырэктара школы, медыцынскую даведку аб стане здароўя дзіцяці і пасведчанне аб нараджэнні.
У гэтыя ж тэрміны кіраўніком установы адукацыі або асобай, якая выконвае яго абавязкі, прымаюцца заявы на вольныя месцы ад бацькоў дзяцей, якія не пражываюць у замацаваным мікрараёне. Прыём такіх дзяцей на свабодныя месцы ў школы і гімназіі будзе праходзіць у парадку чарговасці рэгістрацыі заяў ад іх законных прадстаўнікоў.
Астатнія дакументы, у выпадку, калі будзе прынята станоўчае рашэнне аб прыёме дзіцяці ў школу, неабходна падаць з 16 жніўня па 28 жніўня.
Трэба памятаць, што дзеці, якія пражываюць у мікрараёне ўстановы адукацыі, маюць пераважнае права пры паступленні ў 1-ы клас.
Акрамя таго, сёння пачынаецца прыём дакументаў у 10-я класы беларускіх школ і гімназій. Ён працягнецца па 17 жніўня.
Бацькі падаюць пасведчанне аб нараджэнні або дакумент, які сведчыць асобу дзіцяці, медыцынскую даведку аб стане здароўя, арыгінал пасведчання аб агульнай базавай адукацыі, дакументы, што пацвярджаюць права на ільготы пры паступленні ў профільны клас (пры іх наяўнасці).
У новым навучальным годзе ў Беларусі будуць працаваць 2627 школ, да вучэбных заняткаў у якіх прыступяць каля 1,05 млн навучэнцаў, у тым ліку 90 тыс. першакласнікаў.
Цяпер чытаюць
Алексіевіч: Адно з самых моцных уражанняў у жыцці — калі я апынулася ў натоўпе ў 2020 годзе2
Каментары