На электробусах МАЗ пачнуць ставіць спецыяльныя прылады — алказамкі. Яны не дазволяць завесці машыну, калі ў паветры, якое выдыхае кіроўца, будуць утрымлівацца пары алкаголю, піша «Смартпрэс».
Гэтыя сістэмы распрацоўвае адна з кампаній — рэзідэнтаў Тэхнапарка БДУІР. Яна ўжо мае досвед у стварэнні алкатэстаў, якія працуюць больш чым на 500 беларускіх прадпрыемствах. Такія прылады інтэграваныя з сістэмамі кантролю доступу і ўліку працоўнага часу на заводах.
Падмануць сістэму амаль немагчыма: кожны супрацоўнік праходзіць праверку самастойна — яго ідэнтыфікуюць па пропуску ці праз сістэму распазнавання твару, і адразу фіксуецца фота. Усе даныя адразу адпраўляюцца на сервер, і калі чалавек нецвярозы, яго проста не дапусцяць да працы.
Цяпер кампанія распрацавала алказамок — прыладу, якая ставіцца ў транспарт.
Машыну нельга завесці, пакуль кіроўца не пройдзе праверку на алкаголь. Калі тэст пацвярджае, што чалавек цвярозы, алказамок дазваляе запусціць рухавік. Усе даныя (у тым ліку фота і вынік тэсту) могуць адпраўляцца на сервер ці, напрыклад, у Telegram.
Першым, хто пачне выкарыстоўваць такую сістэму, стане Мінскі аўтазавод — алказамкі будуць усталёўвацца на электробусах МАЗ.
Цяпер чытаюць
Колькасць ахвяр выбуху ў маскоўскім элітным рэстаране на юбілеі генерала, які камандаваў наступам на Кіеў з Беларусі ў 2022-м, вырасла да пяці чалавек44
Каментары