У Баку паліцэйскія праводзяць аперацыю ў офісе расійскага агенцтва «Спутнік Азербайджан». Іншыя падрабязнасці пакуль невядомыя, піша Расійская служба Радыё Свабода.
Галоўны рэдактар медыягрупы «Россия сегодня» Маргарыта Сіманьян распавяла, што супрацоўнікі Пасольства Расіі ў Баку выехалі да офіса выдання. «Супрацоўнікі не выходзяць на сувязь — відавочна, пазбаўлены доступу да тэлефона. Сярод іх ёсць грамадзяне Расіі», — напісала яна ў сваім тэлекрам-канале.
У лютым прадстаўнік МЗС Азербайджана Айхан Гаджызадэ абвясціў аб ліквідацыі «Спутнік Азербайджан» і дадаў, што медыя можа атрымаць акрэдытацыю на працу аднаго карэспандэнта. Report піша, што нягледзячы на гэта, «аказалася, што агенцтва працягвае сваю дзейнасць, а яго супрацоўнікі выходзяць на працу».
Улады Азербайджана вырашылі скараціць колькасць супрацоўнікаў рэдакцыі з 40 да аднаго ў мэтах «аднаўлення балансу ў ўмовах, у якіх працуюць азербайджанскія дзяржаўныя выданні за мяжой, і замежныя журналісты» ў Баку.
Адносіны паміж Азербайджанам і Расіяй абвастрыліся пасля таго, як 27 чэрвеня ў Екацярынбургу былі затрыманыя больш за 50 чалавек азербайджанскага паходжання. Загінулі два чалавекі. Яшчэ двое атрымалі падчас рэйду сур'ёзныя раненні. Баку запатрабаваў прыцягнуць вінаватых да адказнасці.
МЗС Расіі заявіла, што затрыманні праводзіліся ў рамках расследавання цяжкіх злачынстваў, а сітуацыя знаходзіцца пад кантролем. Прадстаўніца ведамства Марыя Захарава ўдакладніла, што гаворка ідзе пра справы, звязаныя з забойствамі, учыненымі ў 2001, 2010 і 2011 гадах.
Цяпер чытаюць
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»2
Каментары