Пакупніку абяцаюць стабільны і высокі пасіўны прыбытак.
За трыццаць мільёнаў даляраў у Мінску прадаюць бізнэс-цэнтр «Аякс», які знаходзіцца на вуліцы Магілёўскай, 1.
Агульная плошча офісных памяшканняў — 16 804 м², а разам з паркінгам — 22 454 м². Шаснаццаціпавярховы будынак мае памяшканні вышэйшага класа «А».
Як пазначана ў аб'яве, офісны будынак прадаецца разам з дзейнымі дамовамі арэнды, што мусіць прыносіць новаму ўласніку стабільны і высокі пасіўны прыбытак.
На сайце бізнэс-цэнтра можна ўбачыць, што большасць памяшканняў цяпер арандаваныя, але і вольных месцаў хапае.
Найменшае вольнае памяшканне мае плошчу 254 м² і знаходзіцца на першым паверсе, метр арэнды ў ім каштуе 40 рублёў (менш за $14). Гэта больш за 10 000 рублёў, або $3400 за месяц.
Таксама вольнымі застаюцца шосты, восьмы, дзявяты і дзясяты паверхі. Плошча арэндных пляцовак складае ад 830 да 915 м², кошт за квадратны метр — ад 51 да 56 рублёў у месяц. То-бок за арэнду цэлага паверха арандатару трэба будзе плаціць ад 42 да 51 тысячы рублёў — каля $14300-$17400 за месяц.
Бізнэс-цэнтр «Аякс» належыць групе кампаній «Тапас». Плошчы ў арэнду тут пачалі здаваць з лета 2020 года. Нейкі час «Аякс» лічыўся доўгабудам, паколькі першы забудоўшчык не здолеў завяршыць будаўніцтва і быў вымушаны прадаць аб’ект.
Сярод уласнікаў «Тапаса» называўся хакеіст з каманды Аляксандра Лукашэнкі Павел Белы. Ён зарабіў вялізныя грошы, калі стаў атрымліваць зручныя і патэнцыйна прыбытковыя пляцоўкі пад забудову ў Мінску.
Цяпер чытаюць
Масквічка распавяла, як разам з жаніхом ледзь не загінула ў аварыі па дарозе на сваё вяселле ў сядзібе пад Лагойскам1
Масквічка распавяла, як разам з жаніхом ледзь не загінула ў аварыі па дарозе на сваё вяселле ў сядзібе пад Лагойскам
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў55
Каментары