Расійскія вайскоўцы стралялі адзін у аднаго дзеля выплат і ўзнагарод за раненні
Сюжэты пра іх «баявыя подзвігі» выпускаў «Першы канал».
СК РФ завяршыў расследаванне першых крымінальных спраў аб махінацыях з раненнямі ў 83-й асобнай гвардзейскай дэсантна-штурмавой брыгадзе, піша «Агенцтва».
Усяго пад падазрэннем 35 чалавек. Адзін з падазраваных — падпалкоўнік Канстанцін Фралоў (пазыўны «Палач») — прызнаўся ў тым, што атрымаў чатыры раненні не ў баі, а ад саслужыўцаў дзеля выплат у 3 млн рублёў (каля 37 тысяч даляраў).
Усё, што ён казаў да гэтага, у тым ліку ў СМІ, аказалася няпраўдай. Як высветліла «Агенцтва», сюжэт пра яго выйшаў на «Першым канале» ў Дзень абаронцы Айчыны.
Паводле звестак «Коммерсанта», начальнік групы спецыяльных аперацый 83-й брыгады Канстанцін Фралоў быў арыштаваны ў чэрвені 2024 года, праз некалькі дзён узялі і яго камандзіра, палкоўніка Арцёма Гарадзілава. Гарадзілаву інкрымінуюць махлярства ў асабліва буйным памеры, Фралову — яшчэ і дачу хабару, незаконны абарот зброі, боепрыпасаў і выбуховых прылад. Абодва прызналі сваю віну.
Следства таксама ўстанавіла 35 удзельнікаў махінацый, якія стралялі адзін у аднаго. Ім за раненні і траўмы з бюджэту выплацілі больш за 200 млн рублёў (каля 2,5 млн даляраў), уручалі ордэны Мужнасці і медалі «За адвагу».
Канкрэтна Фралоў атрымаў чатыры раненні, ён сам насіў знакі за два лёгкія і пяць цяжкіх раненняў. Дзякуючы паказанням і экспертызам высветлілася, што ўсе раненні былі атрыманы не ў баявой абстаноўцы.
Вайсковец прызнаўся, што па яго ж просьбе ў яго стралялі саслужыўцы, якія цэліліся так, каб не зачапіць жыццёва важныя органы. Чатыры ордэны Мужнасці і два медалі «За адвагу» былі ўручаны яму незаконна, мяркуе следства.
Следства лічыць сюжэты пра Фралова ў федэральных СМІ не адпавядаюць рэчаіснасці. Сярод іх відэа пра тое, што ён, будучы бацькам трох дачок, удачарыў нібыта выратаваную з-пад абстрэлу дзяўчынку.
Сумненні выклікалі публікацыі СМІ пра тое, што Фралоў камандаваў самай выніковай групай снайпераў на так званай «СВА». Фэйкавым назвалі і сюжэт пра тое, як Фралова з-пад абстрэлу выратаваў яго саслужывец-палкоўнік.
«Агенцтва» знайшло тыя фэйкавыя сюжэты. «Першы канал» 23 лютага 2024 года паказаў 4-хвіліннае відэа пра «ўнікальную групу снайпераў». Групай, як гаварылася ў сюжэце, кіраваў «адзін з самых выніковых снайпераў у зоне СВА» з пазыўным «Палач».
Карэспандэнт распавёў, што праз афіцэрскі гонар вайсковец пасля сёмага ранення адмовіўся ад рэабілітацыі і вярнуўся ў строй.
Менавіта ў сюжэце «Першага канала» «Палач» распавёў, як нібыта вынес з-пад абстрэлу параненую дзяўчынку, а затым удачарыў яе. Паводле звестак «Першага канала», байцы групы ўвесь час дапамагаюць параненым дзецям і сіротам, выдаткоўваючы на гэта большую частку свайго забеспячэння.
У сюжэце «Першага канала» ваенны быў у шапцы і балаклаве. Але сэрвіс распазнання твараў па адкрытай частцы твару вызначыў, што з верагоднасцю да 98% на відэа быў менавіта Канстанцін Фралоў.
«Агенцтва» высветліла, што 38-гадовы Канстанцін Фралоў — сын Алега Фралова, былога намесніка кіраўніка «Раскосмаса», якога таксама цяпер судзяць за махлярства на дзяржкантрактах.
Цяпер чытаюць
Памятаеце Таццяну Зарэцкую, якая са скандалам звальнялася з Кабінета Ціханоўскай? У Эстоніі яе падазраюць у махлярстве49
Каментары