Казахстан пачаў спыняць усе фуры з Кітая ў Расію, дзе патэнцыйна можа знаходзіцца санкцыёнка
Паводле ўдзельнікаў рынку, такая жорсткасць у кантролі можа сведчыць пра пераход Казахстана да новай палітыкі: строгае і паслядоўнае выкананне заходніх санкцый у дачыненні да Расіі. У выніку павялічваецца колькасць фур, што альбо захраслі ў адстойніках, альбо шукаюць абходныя маршруты праз іншыя краіны.
Ілюстрацыйны здымак. Фота: Vlad Karkov / SOPA Images / LightRocket via Getty Images
На мяжы Казахстана і Расіі сфармаваліся шматкіламетровыя чэргі з фур, што везлі грузы з Кітая. З сярэдзіны верасня мытныя органы Казахстана ўзмацнілі праверкі тавараў падвойнага прызначэння, падсанкцыйнай прадукцыі, электронікі і заходніх брэндаў.
Паводле перавозчыкаў, адбываецца істотны зрух у транзітнай палітыцы краіны: Казахстан пачаў значна больш строга выконваць санкцыйны рэжым, уведзены краінамі Захаду ў дачыненні да Расіі.
Прадстаўнік лагістычнай кампаніі СЛК Максім Ямелін у інтэрв'ю «Коммерсант» адзначае: «Пагранічнікі значна актывізавалі дзейнасць па прадухіленні кантрабанды. Гэта звязана з узмацненнем кантролю за правозам тавараў, што падпадаюць пад санкцыі, і тавараў падвойнага прызначэння».
Пры гэтым з расійскага боку таксама сталі больш жорсткімі праверкі грузаў.
«Адназначна можна сказаць, што гэта не часовы збой, а, хутчэй, новая рэальнасць — узмацненне жорсткасці кантролю і ўсё большае выкананне санкцый заходніх краін», — падсумаваў сітуацыю Ямелін.
Кіраўнік аддзела лагістыкі YM Trans Group Аляксандр Азац'ян кажа, што на аўтамабільным пункце пропуску «Маштакава» паміж Казахстанам і РФ зараз знаходзіцца дзве-тры тысячы грузавікоў. А па словах крыніцы «Коммерсанта», гаворка ідзе аб 7,5 тысячы грузавікоў.
Каментары