«Нам не патрэбны эмоцыі — патрэбна дапамога». Мама зніклага чатыры дні таму Максіма распавяла пра пошукі сына і падтрымку людзей
У Бярэзінскім раёне ўжо чацвёртыя суткі працягваюцца пошукі 14‑гадовага Максіма Зяньковіча, які раніцай 8 лістапада паехаў на веласіпедзе з вёскі Карбаўскае і не вярнуўся, піша «Мінская праўда».
Мама Максіма Вікторыя расказала нам пра тое, як праходзіць пошук сына і пра падтрымку людзей.
— Як вы трымаецеся?
— Калі шчыра, цяжка. Але нас падтрымлівае вера і людзі. Столькі спагадлівых! Бачыце Instagram? Там людзі з Гомеля, з Мінска, з Брэста — усе хочуць прыехаць дапамагчы. Гэта неверагодна.
— Валанцёры, журналісты — усе адгукнуліся…
— Так, але ведаеце, ёсць розніца. Мы ўдзячны тым, хто дапамагае па-сапраўднаму — інфармацыйна і справай. Некаторыя спрабавалі выціснуць з нас эмоцыі. Хтосьці прыязджае проста дзеля карцінкі — са слязамі, з мікрафонам. Але гэта не трэба. Зараз важная не драма, а дапамога. Людзям патрэбна канкрэтыка — хто, дзе, што робіць.
— Валанцёраў шмат?
— Вельмі. Сёння зноў прыязджаюць нашы — будуць прывозіць ежу, чай. Хтосьці бензін, хтосьці прадукты. Мы каардынуем усё, каб хапала тым, хто ў лесе. Мінск увесь уключыўся — людзі тэлефануюць, пішуць, пытаюцца, чым дапамагчы.
— Вы працуеце ці зараз у адпачынку па доглядзе дзіцяці?
— Так, знаходжуся па доглядзе. Але калегі падтрымліваюць — сёння прыедуць, прывязуць усё, што трэба.
— Колькі яшчэ будуць шукаць?
— Пакуль ёсць надзея і людзі. Столькі, колькі хопіць сіл у валанцёраў і міліцыі. Адзін з каардынатараў сказаў мне: колькасць людзей толькі расце. Гэта яшчэ не мяжа. Учора прыходзіў мясцовы доктар. Мы тады былі ў лесе, ён падышоў, пагаварыў, падтрымаў. Вельмі добрыя словы сказаў… «Верце, што Бог дапаможа яго знайсці».
— Вы мясцовая?
— Не. Гэта вёска родных мужа. Мы проста прыязджалі дапамагчы ім з гаспадаркай — дах хацелі рамантаваць… А цяпер вось усё гэта.
Дома хлопчыка чакае яго верны сябар — сабака па мянушцы Бэла. Ёй восем гадоў, і Максім вельмі яе любіць.
— Бэла ўвесь час сядзіць каля двара, азіраецца, чакае. Каля дома разбіты лагер, і людзі не сыходзяць — усе вераць, што Максім знойдзецца, — расказала мама хлопчыка.
Яна таксама стварыла старонку ў сацсетках з просьбай аб дапамозе.
Цяпер чытаюць
З псіхбальніцы збег былы начальнік Ганцавіцкай міліцыі14
Каментары