Вогненны цягнік пад Брэстам: калі хацеў у Маларыту, а трапіў у Хогвартс
У тыктоку завірусілася відэа, на якім пасажырскі цягнік цягне за сабой слуп вогненных іскраў. Ролік, які карыстальнікі тут жа празвалі цягніком прывіднага гоншчыка, менш чым за суткі сабраў амаль 400 тысяч праглядаў і велізарную хвалю абмеркаванняў, піша выданне «Першы».
Аўтар відэа падаў толькі кароткі подпіс: «Дызель-цягнік Маларыта — Брэст». Але ў каментарах хутка з'явіліся іншыя відавочцы.
Адзін мужчына ўдакладніў, што гэта мог быць цягнік Лунінец — Брэст. Ён расказаў, што ехаў у другім вагоне, калі раптам пайшлі іскры, у салоне запахла гарэлым і нават адключылася святло. Паводле яго, падзеі адбыліся ўвечары 18 лістапада на пад'ездзе да станцыі Брэст-Цэнтральны.
Многім гледачам гэта нагадала, што цягнік быццам выйшаў проста з фантастычнага фільма. Хтосьці жартаваў, што за рулём сядзіць прывідны гоншчык з Marvel, іншыя запэўнівалі, што гэта экспрэс у Хогвартс ці нават скразны рэйс Брэст — Мордар.
«Не, хіба вы не бачылі, што ў Брэст імчыцца Дзед Мароз. Ялінку на плошчы паставілі», — пісалі карыстальнікі.
Але паміж жартаўнікамі знайшліся і тыя, хто пазнаў характэрны тэхнічны эфект. На дызельных цягніках выкарыстоўваецца сістэма фільтрацыі выхлапу, перыядычна там адбываецца прапал сажавага фільтра. Менавіта так збоку можа выглядаць працэс выпальвання назапашанай сажы пры павышанай тэмпературы выхлапных газаў.
Адзін з гледачоў, знаёмы з канструкцыяй рухавіка, растлумачыў, што пад вялікім абаротам праз адмову пары фарсунак паліва магло паступаць няправільна, сажа ў выхлапной сістэме прапіталася саляркай і ўспыхнула. Паводле яго слоў, такія «пыхі» доўжацца 3‑5 хвілін і праходзяць у рэжыме самаачысткі. Часам дастаткова знізіць абароты, каб полымя знікла.
Прапал сажавага фільтра — нармальная тэхнічная працэдура, якая выкарыстоўваецца на дызельных рухавіках для змяншэння шкодных выкідаў. Падчас яе тэмпература ў сістэме рэзка павышаецца, сажа выгарае, а звонку гэта можа выглядаць як моцнае полымя і іскры.
У светлы час сутак такое амаль незаўважна, але ўвечары стварае эфект вогненнага шлейфу. Небяспека магла б узнікнуць толькі ў экстрэмальна сухое надвор'е, калі іскры могуць трапіць на траву.
Цягнік прадоўжыў рух і прыбыў у пункт прызначэння. А гледачы, уражаныя відовішчам, зладзілі абмеркаванне, параўноўваючы цягнік то з Марці і Докам з «Назад у будучыню», то з экспрэсам у іншую рэальнасць.
Дыверсант на польскай чыгунцы дапусціў дзіўную памылку — падарваў не тую рэйку
Новы графік БЧ скасоўвае два цягнікі ў Віцебскай вобласці. Без чыгункі застануцца і некаторыя райцэнтры
«У лісце чыгункі ні слова праўды». Хлопца з інваліднасцю па зроку высадзілі з цягніка, хоць у яго бясплатны праезд
У вёску на Гродзеншчыне больш не ходзіць дызель. Рэакцыя чыноўнікаў дабіла жыхароў
Цяпер чытаюць
35‑гадовы дальнабойшчык з Беларусі раптоўна памёр у Кітаі. Гэта муж самай тытулаванай беларускай дзюдаісткі3
Каментары