Кіраўнік Адміністрацыі Лукашэнкі Дзмітрый Круты заявіў, што ўлады настроеныя стварыць у краіне вытворчасць цывільных самалётаў. Пры гэтым ён прызнаў, што па стане на цяперашні момант у Беларусі фактычна няма ўласнай авіябудаўнічай базы.
Таму зроблена стаўка на кааперацыю з расійскімі вытворцамі, якія самі сутыкаюцца з цяжкасцямі пры рэалізацыі планаў па стварэнні і запуску вытворчасці расійскіх пасажырскіх самалётаў.
Па словах Крутога, цяпер наладжаныя кантакты з асноўнымі авіяцыйнымі заводамі Расіі, што робяць беларускія прадпрыемствы ў Баранавічах, Мінску і Оршы.
Чыноўнік адзначыў, што ў Беларусі цяпер будуюцца некалькі вытворчых карпусоў — ад фарбавальных цэхаў да плошчаў для выпуску складаных, у тым ліку даўгамерных дэталяў для самалётаў. Гэта робіцца ў межах сумеснай праграмы імпартазамяшчэння з Расіяй, але пакуль гэта разавыя заказы.
Па словах Крутога, улады хочуць стварыць у Беларусі ўласную школу авіябудавання і прыкладна ў 2029—2030 гадах пачаць выпуск самалётаў.
«Вяршыняй нашага «авіяцыйнага плана» стане стварэнне паўнавартаснага цывільнага самалёта ў Беларусі дзесьці да 2029—2030 года. Пакуль тэрміны такія», — сказаў ён.
Раней Баранавіцкі авіяцыйны рамонтны завод паказаў праект самалёта, які плануецца выпускаць разам з Уральскім заводам цывільнай авіяцыі. Праўда, пакуль невядома, меў на ўвазе Круты менавіта гэтую мадэль ці цалкам беларускі самалёт.
Яшчэ ў 2023 годзе тагачасны прэм’ер-міністр Раман Галоўчанка абвяшчаў пра сумесны з Расіяй праект серыйнай вытворчасці двухматорнага лёгкага самалёта. Тады ён казаў, што першы такі борт павінен узляцець да 2028 года.
Цяпер чытаюць
Соф'я Сапега: Пратасевіч нагаварыў на мяне цэлы том крымінальнай справы31
Соф'я Сапега: Пратасевіч нагаварыў на мяне цэлы том крымінальнай справы
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары