Ватыкан вярнуў Канадзе больш за 60 каштоўных музейных прадметаў, датычных да культуры мясцовых карэнных народаў. Сярод іх — унікальны інувіалуіцкі каяк, выраблены з плаўніка і абцягнуты цюленевай скурай, паведамляе CBC News.
Гэты каяк і іншыя рэліквіі захоўваліся ў ватыканскіх музеях каля ста гадоў. Цяперашняя рэстытуцыя — адно з найбуйнейшых вяртанняў культурнай спадчыны карэнных народаў Канады з еўрапейскіх калекцый.
На перададзеным каяку дагэтуль бачныя сляды выкарыстання, у тым ліку тлустыя плямы. Для інувіалуітаў такія чоўны мелі вялікае значэнне: яны былі лёгкія, хуткія і вырабляліся індывідуальна пад кожнага паляўнічага. Адначасова на ваду маглі выходзіць сотні такіх каякаў.
Вернутыя артэфакты ўжо вывезлі з Ватыкана: спачатку аўтатранспартам у Франкфурт-на-Майне, а потым самалётам адправяць у Канаду. Іх суправаджаюць прадстаўнікі карэнных народаў. Спачатку ўсе прадметы трапяць у Канадскі музей гісторыі, дзе іх агледзяць спецыялісты і старэйшыны супольнасцяў.
Каяк, праўда, пакуль не вернецца ў інувіалуіцкі рэгіён — там няма належных умоваў для яго захавання. Мясцовая грамада інувіалуітаў спадзяецца, што старэйшыны змогуць вывучыць традыцыйныя тэхнікі яго вырабу. Майстар Дарэл Насагалуак адзначае, што з нецярпеннем чакае моманту, калі зноў убачыць гэты човен, які быў вывезены сто гадоў таму.
Працэс вяртання пачаўся ў 2022 годзе з ініцыятывы Інувіалуіцкага рэгіянальнага корпуса. Спачатку гаворка ішла толькі пра каяк, але Ватыкан прапанаваў вярнуць яшчэ каля 60 прадметаў інуітаў і іншых карэнных народаў, а таксама адзін артэфакт метысаў.
Гэтыя культурныя аб’екты трапілі ў Ватыкан у 1923—1925 гадах, калі місіянеры прыслалі іх на вялікую выставу ў Рыме. Потым яны сталі часткай калекцыі этналагічнага музея Anima Mundi.
Цяпер складана дакладна сказаць, былі гэтыя прадметы тады падараваныя прадстаўнікамі карэнных народаў ці забраныя ў іх сілком. Двейн Сміт, кіраўнік Інувіалуіцкага рэгіянальнага корпусу, сумняваецца, што каяк мог быць падарункам, бо для паляўнічага гэта быў асноўны інструмент выжывання.
Цяпер чытаюць
Сталі вядомыя жахлівыя абставіны смерці былога вучонага сакратара Інстытута гісторыі. Яму было 45 гадоў22
Сталі вядомыя жахлівыя абставіны смерці былога вучонага сакратара Інстытута гісторыі. Яму было 45 гадоў
Яе не хацелі браць у музычную школу, а ў 14 яна сыграла ў Карнегі-холе ў Нью-Ёрку. Беларуская скрыпачка — пра жыццё ў Лондоне, заробкі і чым скрыпка Страдывары за 14 мільёнаў еўра адрозніваецца ад звычайнай1313
Каментары