Як у СССР: беларуска паказала, як выглядаюць нумары ў санаторыі пад Брэстам
Беларуска абурылася ўмовамі пражывання ў санаторыі «Брэстаграздраўніца», бо рэальныя нумары не адпавядаюць фатаздымкам на афіцыйным сайце.
Сваім водгукам на санаторый «Брэстаграздраўніца» беларуска Ксенія падзялілася ў тыктоку. На яе меркаванне, умовы ў санаторыі жадаюць лепшага, піша BGmedia.
Санаторый «Брэстаграздраўніца» (ці «Бярэсце») месціцца ў Брэсцкім раёне, на тэрыторыі курорта Белае возера. Як вынікае з водгукаў турыстаў на Google maps, ягоны рэйтынг складае 4,3 зоркі з пяці, што лічыцца вышэйшым за сярэдні. Агулам наведвальнікі «Бярэсця» добра ацэньваюць паслугі ў месцы.
Аднак сярод мінусаў некаторыя адзначаюць «савецкую атмасферу», і «сярэдні ўзровень ежы».
Яшчэ чатыры гады таму наведвальнікі санаторыя звярталі ўвагу на адсутнасць належнага рамонту ў розных нумарах. Як вынікае са свежага відэа, якім падзялілася беларуска Ксенія, крытыку людзей так і не прынялі да ведама.
У відэаводгуку, якім падзялілася дзяўчына, відаць, што нумар у «Брэстаграздраўніцы» даўно не рамантаваўся: шпалеры на сценах адклейваюцца, дзвярныя ручкі засталіся нібыта з часоў СССР, шафы ледзь адчыняюцца, а ламінатнае пакрыццё наогул пашкоджанае. У ванным пакоі на трубе можна заўважыць сляды іржы.
«У Беларусі класныя санаторыі, давай з’ездзім», — іранізуе аўтарка відэа. Пазней па невядомых прычынах яна выдаліла свой ролік.
Як выглядаюць нумары на афіцыйным сайце санаторыя
У каментарах пад ролікам дзяўчына адзначыла, што на афіцыйным сайце «Бярэсця» фатаздымкі нумароў зусім іншыя. Па яе словах, «там усё выглядае прыстойна».
Як вынікае з фатаграфій на сайце berestje.by, нумары санаторыя сапраўды выглядаюць акуратнымі і ўтульнымі. Некаторыя пакоі маюць сучаснае абсталяванне (як аднапакаёвыя, так і шматпакаёвыя), а іншыя — не рамантаваліся доўгі час. Але ні на водным здымку не бачна шпалер, што адклейваюцца, так і іншых недахопаў, якія адзначыла беларуска ў сваім відэароліку. Гэта, у сваю чаргу, можа заблытаць турыстаў, якія разлічваюць на камфортны адпачынак, але ў выніку атрымоўваюць «ката ў мяшку».
Кошты на аздараўленне ў «Брэстаграздраўніцы» — ад 97 да 150 рублёў за суткі (у залежнасці ад памеру пакоя).
Што кажуць каментатары
У каментарах пад ролікам прагучалі розныя меркаванні. На думку адных людзей, беларуска сама вінаватая ў сітуацыі, бо яна вырашыла «зэканоміць» на паслугах і абрала для сябе самы танны пакой.
Хтосьці наогул адмаўляе сапраўднасць самога відэа: «Нешта я такога ў «Бугу» не прыкмеціла. І не факт, што тут санаторый паказалі, а не нейкую кватэру. Зараз вельмі шмат жадаючых паклёпнічаць на Беларусь!» — адзначаюць карыстальнікі.
Іншыя ж, наадварот, палічылі, што такія ўмовы — недапушчальныя, бо за гэта так ці інакш плацілі грошы:
«Людзі, вы сур’ёзна? Прычым тут заплаціў, зэканоміў і астатняе? Сам стан пакою, мэблі і тэхнікі вас не засмучаюць? Гэта ж не ўмовы для пражывання чалавека! Куды глядзіць адміністрацыя санаторыя? Прабачце, але ў такое няма жадання ехаць за бясплатна, а тут за гэта і грошы заплацілі», — напісала дзяўчына ў каментарах.
Каментары