Jak u SSSR: biełaruska pakazała, jak vyhladajuć numary ŭ sanatoryi pad Brestam
Biełaruska aburyłasia ŭmovami pražyvańnia ŭ sanatoryi «Brestahrazdraŭnica», bo realnyja numary nie adpaviadajuć fatazdymkam na aficyjnym sajcie.
Svaim vodhukam na sanatoryj «Brestahrazdraŭnica» biełaruska Ksienija padzialiłasia ŭ tyktoku. Na jaje mierkavańnie, umovy ŭ sanatoryi žadajuć lepšaha, piša BGmedia.
Sanatoryj «Brestahrazdraŭnica» (ci «Biareście») mieścicca ŭ Bresckim rajonie, na terytoryi kurorta Biełaje voziera. Jak vynikaje z vodhukaŭ turystaŭ na Google maps, jahony rejtynh składaje 4,3 zorki ź piaci, što ličycca vyšejšym za siaredni. Ahułam naviedvalniki «Biareścia» dobra aceńvajuć pasłuhi ŭ miescy.
Adnak siarod minusaŭ niekatoryja adznačajuć «savieckuju atmaśfieru», i «siaredni ŭzrovień ježy».
Jašče čatyry hady tamu naviedvalniki sanatoryja źviartali ŭvahu na adsutnaść naležnaha ramontu ŭ roznych numarach. Jak vynikaje sa śviežaha videa, jakim padzialiłasia biełaruska Ksienija, krytyku ludziej tak i nie pryniali da viedama.
U videavodhuku, jakim padzialiłasia dziaŭčyna, vidać, što numar u «Brestahrazdraŭnicy» daŭno nie ramantavaŭsia: špalery na ścienach adklejvajucca, dźviarnyja ručki zastalisia nibyta z časoŭ SSSR, šafy ledź adčyniajucca, a łaminatnaje pakryćcio naohuł paškodžanaje. U vannym pakoi na trubie možna zaŭvažyć ślady iržy.
«U Biełarusi kłasnyja sanatoryi, davaj źjeździm», — iranizuje aŭtarka videa. Paźniej pa nieviadomych pryčynach jana vydaliła svoj rolik.
Jak vyhladajuć numary na aficyjnym sajcie sanatoryja
U kamientarach pad rolikam dziaŭčyna adznačyła, što na aficyjnym sajcie «Biareścia» fatazdymki numaroŭ zusim inšyja. Pa jaje słovach, «tam usio vyhladaje prystojna».
Jak vynikaje z fatahrafij na sajcie berestje.by, numary sanatoryja sapraŭdy vyhladajuć akuratnymi i ŭtulnymi. Niekatoryja pakoi majuć sučasnaje abstalavańnie (jak adnapakajovyja, tak i šmatpakajovyja), a inšyja — nie ramantavalisia doŭhi čas. Ale ni na vodnym zdymku nie bačna špaler, što adklejvajucca, tak i inšych niedachopaŭ, jakija adznačyła biełaruska ŭ svaim videaroliku. Heta, u svaju čarhu, moža zabłytać turystaŭ, jakija raźličvajuć na kamfortny adpačynak, ale ŭ vyniku atrymoŭvajuć «kata ŭ miašku».
Košty na azdaraŭleńnie ŭ «Brestahrazdraŭnicy» — ad 97 da 150 rubloŭ za sutki (u zaležnaści ad pamieru pakoja).
Što kažuć kamientatary
U kamientarach pad rolikam prahučali roznyja mierkavańni. Na dumku adnych ludziej, biełaruska sama vinavataja ŭ situacyi, bo jana vyrašyła «zekanomić» na pasłuhach i abrała dla siabie samy tanny pakoj.
Chtości naohuł admaŭlaje sapraŭdnaść samoha videa: «Niešta ja takoha ŭ «Buhu» nie prykmieciła. I nie fakt, što tut sanatoryj pakazali, a nie niejkuju kvateru. Zaraz vielmi šmat žadajučych paklopničać na Biełaruś!» — adznačajuć karystalniki.
Inšyja ž, naadvarot, paličyli, što takija ŭmovy — niedapuščalnyja, bo za heta tak ci inakš płacili hrošy:
«Ludzi, vy surjozna? Pryčym tut zapłaciŭ, zekanomiŭ i astatniaje? Sam stan pakoju, mebli i techniki vas nie zasmučajuć? Heta ž nie ŭmovy dla pražyvańnia čałavieka! Kudy hladzić administracyja sanatoryja? Prabačcie, ale ŭ takoje niama žadańnia jechać za biaspłatna, a tut za heta i hrošy zapłacili», — napisała dziaŭčyna ŭ kamientarach.
Babaryka try chviliny adkazvaŭ na pytańnie, čyj Krym. Tak i nie adkazaŭ89
Kamientary