Шрайбман пра тое, ці паедуць масава расіяне ў Беларусь з-за блакіровак інтэрнэту і чаму гэта не праблема
«З сённяшняга пулу расійскага грамадства гэта, на мой погляд, дакладна не горшыя людзі».
Аналітык Арцём Шрайбман у выпуску ютуб-праграмы «Гадзіннічак цікае» адрэагаваў на навіны, што з-за блакіровак інтэрнэту і заходніх сацсетак расіяне могуць пачаць пераязджаць у Беларусь.
Шрайбман заўважае, што калі такая міграцыя і будзе, то не масавая.
«Сотні тысяч расіян не падымуцца і не зменяць месца жыхарства толькі таму, што ў іх мабільны інтэрнэт ці фэйсбук, тэлеграм пачалі лагаць ці не працаваць. Калі яны пераедуць (магчыма, сотні, магчыма, тысячы), то ў памерах краіны гэта няшмат. Я думаю, гэта будзе такая выбарка людзей, якія даволі матываваныя, якія эстэтычна і этычна не прымаюць гэтыя забароны.
Яны, магчыма, не з'ехалі раней з Расіі з-за вайны і не пратэставалі супраць вайны, бо не былі палітызаваныя дастаткова, магчыма, былі вельмі маладымі, калі пачалася поўнамаштабная вайна.
Але з сённяшняга пулу расійскага грамадства гэта, на мой погляд, дакладна не горшыя людзі. І я думаю, што прыезд такіх людзей у Беларусь не абавязкова азначае, што да нас нейкая арда прыехала. Я б усё ж не мазаў усіх расіян адной фарбай».
Да таго ж у Беларусі дэмаграфічная праблема, і краіне ўсё роўна прыводзіцца прыцягваць працоўных мігрантаў. А расіянам, якія бягуць ад забарон, разважае Шрайбман, прасцей уліцца ў наша грамадства.
«Што адбываецца (пра гэта казаў Дзмітрый Гурневіч са «Свабоды» і шмат хто іншы) — у перапісах Беларусі праз дзесяцігоддзі бачны трэнд, у якім расіяне асімілююцца і становяцца беларусамі».
Каментары
1) так - арда (чытай К. Маркса)
2) пры гэтым, іх Беларусаваць будзе не цяжка , праз мову ў гісторыю ВКЛ