На мяжы Беларусі з Украінай узнікла пагроза буйнога ляснога пажару, які рухаецца з украінскага боку ў напрамку Гомельскай вобласці, паведаміла Міністэрства лясной гаспадаркі.
Паводле інфармацыі Мінлясгаса, агонь ужо знаходзіцца прыкладна за 2 кіламетры ад беларускай тэрыторыі. У зоне рызыкі — лясы Мілашавіцкага лясгаса, што ў Лельчыцкім раёне. Сітуацыя ацэньваецца як напружаная, бо гаворка ідзе пра шырокі фронт пажару, які цяжка стрымліваць.
Леснікі рыхтуюцца да найгоршага сцэнарыя: калі агонь дасягне мяжы, яго будуць тушыць сіламі некалькіх лясгасаў Гомельшчыны. У гатоўнасці знаходзяцца больш за 80 чалавек з розных устаноў, у тым ліку з Нараўлянскага, Мазырскага, Ельскага, Жыткавіцкага і Калінкавіцкага лясгасаў.
На мяжы дзяжураць больш за 15 адзінак тэхнікі, уключаючы пажарныя машыны. Чакаецца, што найбліжэйшую ноч работнікі лясной гаспадаркі правядуць у рэжыме ўзмоцненага дзяжурства, сочачы за развіццём сітуацыі і гатовыя дзейнічаць у любы момант.
Каментары