За права на аднадзённае наведванне Венецыі збіраюцца браць па 30 еўра. Цяперашні збор нікога не спыняе
Улады Венецыі разглядаюць магчымасць павялічыць збор для турыстаў, якія прыязджаюць у горад толькі на адзін дзень. Цяпер ён складае ад 5 да 10 еўра, а ў будучыні максімальная сума можа вырасці да 30 еўра. Канчатковыя параметры збору на 2027 год Венецыі яшчэ трэба ўзгадніць з урадам Італіі, паведамляе Reuters.
Як паведаміў дарадца гарадской адміністрацыі па бюджэце і падатках Мікеле Дзурын, цяперашні збор практычна даступны ўсім наведвальнікам і таму ўжо не выконвае функцыю стрымлівання турыстычнага патоку. У выніку ўлады абмяркоўвалі нават павышэнне платы да 50 еўра, але ў выніку могуць абмежавацца максімальнай стаўкай у 30 еўра.
Мэта прапанаванай меры — скараціць колькасць турыстаў, якія прыязджаюць у Венецыю на адзін дзень у найбольш загружаныя перыяды.
Збор за аднадзённае наведванне горада Венецыя ўвяла ў 2024 годзе. У 2026 годзе ён складаў 5 еўра пры аплаце загадзя і 10 еўра, калі білет набываўся незадоўга да наведвання.
Павышэнне збору абмяркоўваецца на фоне росту турыстычнай нагрузкі на Італію. У 2023 годзе краіну наведалі каля 65 мільёнаў замежных турыстаў, што адпавядала ўзроўню да пандэміі каранавірусу.
Раней, у жніўні 2024 года, урад Італіі прапаноўваў павялічыць максімальны турыстычны збор за пражыванне да 25 еўра за ноч. Яго памер прапаноўвалася звязаць з коштам нумара: ад 5 еўра для жылля таннейшага за 100 еўра да 25 еўра для нумароў даражэйшых за 750 еўра.
Да таго часу найбольш папулярным турыстычным кірункам Італіі ўжо дазволілі павялічваць збор за пражыванне да 10 еўра за ноч. Агульныя паступленні ад турыстычных збораў у краіне выраслі да 775 мільёнаў еўра.
Каментары