«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек

Апошнія дні жыхары Альгомеля як прыбітыя. «Мы ж усе ў вёсцы як сям’я, ледзь не ў кожнага побач сваякі», — кажа мясцовая жыхарка.

Альгомель — вялікая вёска на Палессі, больш чым на 1000 чалавек. Гэта Столінскі раён, хоць да райцэнтра ажно 60 км па трасе. Ёсць і праваслаўная царква, і баптысцкая.

У самога 33‑гадовага Сяргея Мішкова, які спачатку нажом забіў двух братоў, а пасля і іх маці, тут шмат цёзак.

«Ён з выгляду быў спакойным, ездзіў на рыбу, рабіў на «Палессі» (адно з асноўных сельскагаспадарчых прадпрыемстваў Столінскага раёна — НН)», — расказваюць пра яго суседзі.

«Жыў адзін. Дзеці ў яго ёсць — трое. І жонка была, але яны ў разводзе. Жанчына не адсюль, то забрала малых з сабой».

Гэты «спакойны» мужчына ў маі 2018 года ўчыніў сваё першае забойства — Сяргею на той момант было 25 гадоў. Згодна з матэрыяламі справы, якімі з «Нашай Нівай» падзяліліся ў «Belpol», Мішкоў тады забіў 51‑гадовую жанчыну у суседняй вёсцы Вялікае Малешава — канфлікт таксама адбыўся падчас п'янкі. І забіваў сваю першую ахвяру, як і цяпер, Мішкоў нажом.

У тагачаснай міліцэйскай зводцы гаварылася, што ў Мішкова не трое, а нават чацвёра дзяцей.

Менавіта пасля першага забойства і арышту з Сяргеем, па словах суседзяў, і развялася жонка.

Невядома, які тэрмін атрымаў Мішкоў, але мінімум, які даюць за забойства, шэсць гадоў. Амністый па такім артыкуле даўно не было. Умоўна-датэрміновае вызваленне тэарэтычна магчымае, але прымяняецца нячаста.

Адсядзеў, вярнуўся ў Альгомель. Апошнія гады жыў пад адным дахам з бацькамі.

«Вельмі добрыя ў яго бацькі. Тата выдатны, нават не п’е. Гора для іх, гора», — уздыхаюць мясцовыя.

За пару дзён да трагедыі Сяргей звольніўся з працы.

Яго новымі ахвярамі стала сям’я Кажанавых з вуліцы Новай — у іх доме і адбылася разня. Незразумела, што стала прычынай канфлікту, але госць схапіў нож, што трапіў пад руку. Спачатку расправіўся з братамі, а пасля з іх маці.

На міліцэйскім відэа Сяргей Мішкоў кажа, што затрыманы за трайное забойства. «Каго забіў?» — «Двух мужыкоў і адну жанчыну», — уздыхае ён. «Дзе гэта было?» — «Дзярэўня Альгомель». «Дзе ўзяў нож?» — «Дзе папаўся, там і ўзяў…»

Хто былі яго ахвяры?

64‑гадовая Марыя Кажанава, гаспадыня дома, у мінулым працавала жывёлаводам. Яе муж Пятро памёр, але старэйшыя дзеці — 37‑гадовы Сяргей і 40‑гадовы Аляксандр — заўсёды былі пры ёй. Абодва лічыліся беспрацоўнымі. У сям'і ёсць яшчэ малодшы сын, Мікола.

«Выпівалі, але зрэдку», — характарызуюць Кажанавых аднавяскоўцы.

Пасля забойства Сяргей паспрабаваў інсцэніраваць у доме беспарадак, склаў нябожчыкаў побач і схаваўся ў сваёй знаёмай, але міліцыя хутка выйшла на яго след.

За забойства двух і больш чалавек Мішкову ў любым выпадку пагражаў бы расстрэл. Але судовая практыка паказвае, што ў яго выпадку пагроза смяротнага пакарання не тэарэтычная, а вельмі высокая.

Калі чалавек пасля таго, як адбыў пакаранне, вярнуўся да старога, ён відавочны кандыдат на найстражэйшае пакаранне. А ў сітуацыі з Мішковым мала таго, што адбыўся рэцыдыў, дык яшчэ і на яго новым рахунку ажно тры ахвяры.

• 2
• 0
• 0
• 9
• 2
• 4
• 6
• 0