Мінск выбраў Кіеў

На пасяджэнні выканкама УЕФА ў Мінску 4 кастрычніка вызначаны фармат правядзення фінальнай часткі чэмпіянату Еўропы 2012 года, які арганізуюць Польшча і Украіна.

Як паведаміў на прэс-канферэнцыі прэзідэнт УЕФА Мішэль Плаціні, краіны правядуць першынство на парытэтнай аснове: у чатырох польскіх і чатырох украінскіх гарадах. Група, А згуляе ў Варшаве і Вроцлаве, група В — у Харкаве і Львове, група С — у Гданьску і Познані, група D — у Кіеве і Данецку. Зборная Польшчы выступіць у групе, А (першыя дзве сустрэчы, уключаючы матч адкрыцця 8 чэрвеня, яна правядзе ў Варшаве, трэці — у Вроцлаве), зборная Украіны — у групе D (першы матч у Кіеве, другі і трэці — у Данецку).

Чвэрцьфіналы пройдуць у Варшаве, Гданьску, Данецку і Кіеве, паўфіналы — у Данецку і Варшаве, фінал — у Кіеве 1 ліпеня.

Прэзідэнт Федэрацыі футбола Украіны Рыгор Суркіс выказаў падзяку «памяркоўнасці і мудрасці» кіраўніцтва УЕФА. Ён адзначыў, што ва Украіне былі праблемы з падрыхтоўкай да Еўра-2012 і яшчэ паўгода таму ва УЕФА не былі перакананыя, што Украіна зможа годна прыняць чэмпіянат. «Аднак перафарматаванне ўлады ва Украіне дазволіла ў кароткія тэрміны зрабіць грандыёзны рывок», — заявіў Суркіс. Ён выказаў упэўненасць, што за час, які застаўся да Еўра-2012, Украіна зможа вырашыць астатнія праблемы. Такую ж пазіцыю выказаў і Плаціні.

«На сённяшні дзень Украіна і Польшча могуць спаць спакойна, хіба што калі землятрус здарыцца», — сказаў Плаціні.

Прэзідэнт УЕФА жартам заявіў, што апошнія некалькі тыдняў незадаволены Беларуссю, а затым павіншаваў яе зборную з перамогай над французамі ў стартавым матчы адборачнага турніру Еўра-2012.

На мінскім пасяджэнні выканкама УЕФА ўнесены змены ў фарміраванне груп Лігі Еўропы ў 2012–2015 гадах. Наўпрост туды будуць трапляць уладальнікі кубкаў краін першай шасцёркі рэйтынгу УЕФА, тады як раней такое права мелі толькі ўдзельнікі нацыянальных чэмпіянатаў.

Вызначаны гаспадары жаночага чэмпіянату Еўропы 2013 года (Швецыя), юнацкіх чэмпіянатаў Еўропы U-17 2012 і 2013 гадоў (Славенія і Славакія), маладзёжных чэмпіянатаў Еўропы U-19 2012 і 2013 гадоў (Эстонія і Літва), чэмпіянатаў Еўропы U-19 сярод юніёрак 2012 і 2013 гадоў (Турцыя і Уэльс).

Выканкам папярэдзіў футбольную федэрацыю Босніі і Герцагавіны пра неабходнасць змянення статута да 31 сакавіка 2011 года, іначай яе членства ва УЕФА будзе прыпынена. Боснія і Герцагавіна выступае ў адной групе з беларускай зборнай у кваліфікацыі Еўра-2012.

• 0
• 0
• 0
• 0
• 0
• 0
• 0
• 0