Германія: Працэс збліжэння Беларусі і ЕС «моцна пацярпеў»

Германія занепакоеная парушэннямі падчас выбарчага працэсу і разгонам дэманстрацыі апазіцыі ў Беларусі. Кіраўнік МЗС Германіі Гіда Вестэрвэле назваў непрымальным збіццё і арышты апазіцыянераў, якія хацелі скарыстацца правам свабоднага волевыяўлення.

Прадстаўнік урада Германіі Штэфэн Зайнберт заявіў, у сваю чаргу, што краіна вельмі занепакоеная падзеямі ў Беларусі. «Шмат што паказвае на тое, што не былі выкананыя міжнародныя стандарты, якія датычаць правядзення свабодных і справядлівых выбараў. Асаблівую трывогу выклікае тое, што большасць апазіцыйных кандыдатаў знаходзяцца пад арыштам, а некаторыя былі параненыя падчас арышту», — заявіў ён. Зайнберт падкрэсліў, што федэральны ўрад заклікае неадкладна вызваліць апазіцыйных палітыкаў і журналістаў. Паводле яго словаў, прэзідэнцкія выбары 19 снежня былі «тэстам для далейшых адносін паміж ЕС і Беларуссю, таму працэс узаемнага збліжэння «моцна пацярпеў».

Упаўнаважаны па правах чалавека і гуманітарнай дапамозе Маркус Лёнінг выказаў абурэнне дзеяннямі беларускай міліцыі супраць дэманстрантаў, якія змагаюцца за свабодныя і справядлівыя выбары.

«Тое, што Аляксандр Лукашэнка дазваляе біць сваіх грамадзян і кандыдатаў ад апазіцыі, а міліцыя сваімі дзеяннямі перашкаджае журналістам расказваць пра гэтыя падзеі, дэманструе аўтарытарнае мысленне рэжыму ў Мінску»,

Незадаволенасць падзеямі ў Мінску выказалі і дэпутаты Бундэстагу і нямецкія эксперты. На думку эксперта Нямецкай асацыяцыі замежнай палітыкі Мары-Лені Май, разгон дэманстрацыі ў Мінску сведчыць пра тое, што для Лукашэнкі збліжэнне з ЕС не з’яўляецца прыярытэтам. «Замест гэтага ён сканцэнтруецца на партнёрстве з Расіяй», — заявіла яна ў інтэрв’ю РАР.

Падзеі ў Мінску асудзілі высокапастаўленыя асобы Польшчы, Францыі, Еўрапарламента. Нагадаем, што паводле дадзеных беларускага ЦВК, Аляксандр Лукашэнка атрымаў каля 80% галасоў выбаршчыкаў пры яўцы больш чым у 90%. Місія АБСЕ назвала падлік галасоў не адпаведным дэмакратычным стандартам. Прыхільнікі апазіцыі, пратэстуючы супраць фальсіфікацыі вынікаў выбараў, 19 снежня выйшлі на акцыю пратэсту, якая была разагнаная АМАПам. Лік затрыманых ідзе на сотні, многія збітыя. У прыватнасці, кандыдат у прэзідэнты Уладзімір Някляеў быў шпіталізаваны, прычым пасля яго выкралі з лякарні невядомыя ў цывільным. Некалькі кандыдатаў ад апазіцыі былі арыштаваныя, іх месцазнаходжанне невядомае.

• 0
• 0
• 0
• 0
• 0
• 0
• 0
• 0