Некалькі спраў на падставе частак 2, 3 і 4 артыкула 209 (махлярства, у тым ліку ў асабліва буйным памеры) і часткі 2 артыкула 211 (прысваенне) Крымінальнага кодэкса распачата ў Кастрычніцкім РУУС Мінска ў дачыненні да рыэлтара аднаго са сталічных агенцтваў нерухомасці.
Як паведаміў прэс-афіцэр раённага ўпраўлення ўнутраных спраў Антон Санкевіч, з 2009 года рыэлтар махлярскім шляхам завалодвала грашыма кліентаў. Калі людзі звярталіся ў агенцтва з намерам набыць новую жылплошчу, жанчына патрабавала ў іх перадаплату. Кліенты пакідалі махлярцы патрэбную суму, але надалей абяцаныя кватэры так і не траплялі да патэнцыяльных купцоў. Такім чынам рыэлтарка зарабіла звыш 100 млн рублёў.
Паводле слоў Санкевіча, зараз вядома пра 26 пацярпелых. Аднак міліцыя ўпэўнена, што іх значна больш.
Каментары