За паўгода на тэрыторыі нацпарку «Нарачанскі» пад коламі аўто загінула 15 дзікіх жывёл
За паўгода на аўтадарогах, якія праходзяць па тэрыторыі нацыянальнага парку "Нарачанскі", пад коламі машын загінула 15 дзікіх жывёл.Пра гэта паведаміў начальнік аддзела аховы жывёльнага свету, вадаёмаў і паляўнічай гаспадаркі нацпарку Эдуард Васілеўскі 23 жніўня на пасяджэнні круглага стала ў Мінску.
Паводле яго слоў, людзі ў гэтых дарожна-транспартных здарэннях не пацярпелі. У асноўным ДТЗ адбываліся ў начны час, калі аўтамабілі рухаліся са значнай хуткасцю, ігнаруючы знакі, якія папярэджваюць пра магчымасць з'яўлення дзікіх жывёл.
Аўтамабілі часцей за ўсё збівалі казуль, дзікоў, а зімой — таксама ласёў, якія выходзяць на шашу паласавацца соллю.Спецыяліст адзначыў, што часам пазбегнуць сутыкнення было аб'ектыўна цяжка: перад аўтамабілем на дарогу выскоквала не адна жывёла, а, напрыклад, статак дзікоў.
Васілеўскі нагадаў пра неабходнасць зніжаць хуткасць пры руху на ўчастках нацпарку, дзе дарожныя знакі папярэджваюць пра магчымасць з'яўлення жывёл. Асабліва асцярожным трэба быць у цёмны час сутак.
Спецыяліст адзначыў, што ў найбліжэйшы час у нацпарку не плануецца ўстаноўка сеткавай агароджы, якая б перашкаджала выхаду жывёл на праезную частку. Падобныя агароджы ўстанаўліваюцца ў нацпарках у шэрагу краін ЕС, аднак лясныя масівы парку "Нарачанскі", на думку Васілеўскага, агарадзіць нерэальна: агульная плошча парку складае 209 тыс. га.
Каментары