Сіноптыкі зноў перагледзелі прагнозы ў бок пагаршэння.
На мінулым тыдні метэаролагі чакалі, што зіма трохі адпусціць свае абцугі пасля выхадных. Анягож!
У чацвер ізноў чакаецца да мінус 25, а ў нядзелю — і ўсе 30!
Тэмпература паветра ў чацвер, пятніцу і суботу на мінулым тыдні апускалася на ўсходзе да 34 градусаў, а ў цэнтры да мінус 29 градусаў. Гэта былі нахаладнейшыя дні гэтай зімы.
Такой халоднай зімы не было ў Беларусі ад 1986 года.Тады на большай частцы краіны вымерзлі сады. Тое самае здарыцца і зараз. Асабліва цяжка дрэвам тое, што мароз хапіў у лютым, пад канец зімы. Снежаньскія маразы сады трываюць лепей.
Такія марозы ствараюць надзвычайную сітуацыю і для тэхнікі:пры мінус 30 можа не заводзіцца аўтатранспарт, узрастае да крытычнай нагрузка на лініі электраперадачы і цеплатрасы.
Міністэрства аховы здароўя рэкамендавала спыніць заняткі ў тых школах, дзе дзецям далёка дабірацца. У садках дзяцей перасталі выводзіць на прагулкі.
Лютаўскія маразы апанавалі не толькі Беларусь, а цэлую Еўропу. Гэта арктычны антыцыклон споўз і затрымаўся над нашым кантынентам.
Украіна прыпыніла экспарт электраэнэргіі ў Беларусь: лютыя маразы прывялі да рэзкага росту спажывання электрычнасці ў нашых суседзяў.На шчасце, вялікіх збояў у падачы цяпла і энэргіі пакуль нідзе не фіксуецца. Камунальная гаспадарка пакуль выдатна вытрымлівае экстрэмальныя ўмовы працы.
Пры моцным марозе малым дзецям няможна гуляць больш за 10–20 хвілін.Трэба расціраць ім нос і шчокі, каб не было абмаражэння.
Вопратка мусіць быць шматслойнай і свабоднай, каб між слаямі трымалася цёплае паветра. Найлепш саграе цёплае піццё, але не варта піць жэжкае перад выхадам на двор, каб не распарыцца.
Самая частая праблема з аўтамабілямі ў мароз — разрадка акумулятара.Аднак і летняе дызпаліва, і зношаныя свечы запальвання, і неадпаведная тэмпературам аліва таксама могуць стаць прычынай праблемаў як у бензінавых, так і дызельных аўтамабілях. Варта ведаць, што пры такіх нізкіх тэмпературах знос рухавіка максімальны. Таму паездкі варта абмежаваць не толькі з меркаванняў бяспекі, але і дзеля эканоміі.
Існуе пагроза жыццю бяздомных грамадзян, а таксама тых вяскоўцаў, хто жыве ў халодных хатах.
У розных краінах Усходняй Еўропы замёрзла 163 асобы. Па Беларусі такіх звестак няма: ахвяры ёсць і ў нас, але асобны ўлік у нашай краіне не вядзецца.
Хто можа, пакідайце дзверы пад’ездаў незамкнёнымі. Калі бачыце п’яных на вуліцах, адразу выклікайце да іх «хуткую дапамогу».
Цяпер чытаюць
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе55
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе5
Таццяна Заміроўская першы раз за 11 гадоў вярнулася з ЗША ў Еўропу. Многія манеры, звычкі і нават птушкі, якіх мы не прыкмячаем, выклікалі ў яе буру ўспамінаў99
Каментары