Кіроўца BMW збіў на рэгуляваным пераходзе жанчыну 1932 г.н.
У сераду 28 сакавіка на праспекце Незалежнасці (насупраць Нацыянальнай бібліятэкі) кіроўца легкавіка збіў насмерць жанчыну, якая пераходзіла дарогу па рэгуляваным пешаходным пераходзе, паведамляе партал Auto.onliner.by. Паводле афіцыйнай інфармацыі з прэс-службы МУС, здарэнне адбылася ў 19.55, за рулём BMW знаходзіўся кіроўца 1981 г.н.
Паводле відавочцаў, жанчына пачала пераходзіць дарогу ў напрамку да бібліятэкі на зялёнае святло, але не паспела. Калі загарэлася зялёнае святло для транспарту, большасць кіроўцаў прапусцілі яе, а кіроўца BMW, які ехаў па крайняй правай паласе, вырашыў праскочыць. Злева ад яго стаяў аўтобус МАЗ, з-за якога і выйшла жанчына. Адзін з відавочцаў сцвярджае, што BMW ехаў з відавочным перавышэннем хуткаснага рэжыму.
Учорашняя аварыя каля Нацыянальнай бібліятэкі нагадала пра шэраг падобных здарэнняў на пераходзе каля ГЦ «Рыга» на вуліцы Сурганава. У верасні мінулага года на тым пераходзе загінула 17-гадовая студэнтка. Яна пачала рух па рэгуляваным пешаходным пераходзе на зялёнае святло святлафора, а заканчвала ўжо на чырвонае. У гэты момант яе збіў BMW 520. У студзені на тым жа пераходзе быў смяротна траўмаваны мужчына сталага веку. Ён пачаў пераходзіць вуліцу на зялёнае святло і не паспеў — яго збіў УАЗ.
Каментары