Раніцай 2 лістапада ў жылыя дамы і ўстановы Рагачова была адключана падача вады.
Як паведамілі ў Рагачоўскім райвыканкаме, гэта звязана з правядзеннем рамонтных работ на каналізацыйным калектары, у якім утварыўся затор. Камунальныя службы ўсю ноч спрабавалі яго ліквідаваць, але беспаспяхова. Таму раніцай было прынята рашэнне спыніць водазабеспячэнне. Спецыялісты ўжо знайшлі месца затору і пачалі адкопваць засмечаны ўчастак калектара. Мяркуецца, што ў каналізацыю магло трапіць смецце ад дарожных работ ці хтосьці мог спецыяльна засмеціць калектар.
Школы, дзіцячыя сады і іншыя сацыяльныя ўстановы былі папярэджаны аб спыненні водазабеспячэння, таму неабходны запас для падрыхтоўкі ежы ў сталовых ёсць.
Мясцовыя жыхары скупляюць у магазінах бутыляваную ваду і баяцца, што застануцца без водазабеспячэння на выхадныя. Аднак у райвыканкаме сцвярджаюць, што пасля абеду 2 лістапада ці максімум вечарам водазабеспячэнне будзе адноўлена.