Рэформа МУС мае на ўвазе не кардынальную ломку ведамства, а аптымізацыю структуры. Аб гэтым заявіў сёння Аляксандр Лукашэнка на нарадзе па пытанні рэфармавання МУС.
«Асноўнай мэтай пераўтварэнняў з’яўляецца не кардынальная ломка ведамства, ды нам гэта і не трэба, а канструктыўнае ўдасканаленне яго работы, каб забяспечвалася абарона людзей, грамадства, дзяржавы ад злачынных замахаў з улікам сучасных з’яў і тэндэнцый. Гэта значыць, галоўная задача — міліцыя павінна быць прыстасаваная да сітуацыі ў краіне і вакол нашай дзяржавы», — мяркуе Аляксандр Лукашэнка.
На думку Лукашэнкі, у першую чаргу для гэтага патрабуецца аптымізаваць структуру органаў унутраных спраў, зрабіць яе прасцейшай, выключыць дублюючыя звёны.
Акрамя таго, неабходна скараціць колькасць, вызваліць міліцыю ад неўласцівых ёй функцый, прывесці вайсковы складнік у адпаведнасць з патрабаваннямі сённяшняга дня.
Лукашэнка падкрэсліў, што такую працу трэба правесці на ўсіх узроўнях: ад участковага інспектара міліцыі, надаўшы яму асноўную ўвагу, да кіраўнічых апаратаў органаў унутраных спраў.
Лукашэнка мяркуе, што пры захаванні аб’ёмаў фінансавання гэта дазволіць павялічыць матэрыяльнае стымуляванне супрацоўнікаў, не абцяжарваючы дзяржаўны бюджэт дадатковымі выдаткамі.«Інакш кажучы, усё, што атрымаецца зэканоміць у ходзе рэфармавання МУС, павінна застацца і застанецца ў вас для таго, каб размеркаваць у сувязі з вашымі патрэбамі», — растлумачыў ён.
Лукашэнка акцэнтаваў увагу на неабходнасці вызначыць галоўныя напрамкі рэфармавання, зыходзячы з асноўнага прызначэння органаў унутраных спраў, пры гэтым не забываць аб унутраных рэзервах, якія варта выкарыстоўваць у поўнай меры.
У якасці прыкладу ён прывёў транспартную міліцыю, на долю якой прыпадае каля 1% злачынстваў, што рэгіструюцца ў краіне.
«Відавочна, што ўзровень нагрузкі на асабісты склад там на некалькі парадкаў ніжэйшы, чым у тэрытарыяльных органах. У гэтай сувязі заканамерна паўстае пытанне аб ліквідацыі падобнага дысбалансу. Сістэма транспартнай бяспекі будавалася гадамі і на працягу дзесяцігоддзяў заставалася абсалютна нязменнай. Хоць адбыліся значныя зрухі і у тэхнічным аснашчэнні, і ў арганізацыі работы службы. Ды і той дзяржавы, велізарнай па тэрыторыі, не існуе, калі стваралася транспартная міліцыя, тады гэта было абгрунтавана», — сказаў ён.
У сувязі з гэтым Лукашэнка падкрэсліў, што рашэнне павінна быць усебакова узважаным і абгрунтаваным, што дазваляе не толькі рацыянальна перабудаваць работу, але і захаваць інтарэсы людзей.
Каментары