Іранскія лідары амаль не камунікуюць паміж сабой праз страх праслухоўвання і ліквідацыі
Як піша The New York Times, у кіраўніцтве Ірана цяпер узнікла сур’ёзная праблема з унутранай камунікацыяй: высокапастаўленыя чыноўнікі і сілавікі амаль перасталі кантактаваць паміж сабой.
Галоўная прычына такой сітуацыі — страх перад праслухоўваннем і ракетнымі ўдарамі, якія могуць пасля гэтага адбывацца.
Паводле інфармацыі заходніх разведслужбаў, шэраг іранскіх лідараў былі ліквідаваныя менавіта пасля перахопу іх перамоў або падчас сустрэч у адным месцы. Таму цяпер чыноўнікі пазбягаюць як тэлефонных размоў, так і асабістых сустрэч.
Гэта прывяло да раздробленасці ўлады і парушэння каардынацыі. Хоць дзяржаўныя і вайсковыя структуры працягваюць працаваць, ім цяжка выпрацоўваць агульную стратэгію і прымаць узгодненыя рашэнні, у тым ліку адносна вайны і магчымых перамоў.
Сітуацыя ўскладнілася ў выніку гібелі вярхоўнага лідара Алі Хаменеі. Ягоны сын і пераемнік Маджтаба Хаменеі не з’яўляецца публічна і незразумела, наколькі ён кантралюе ўладу. Частка аналітыкаў мяркуе, што рэальныя рашэнні ў Іране цяпер могуць прымаць прадстаўнікі Корпуса вартавых ісламскай рэвалюцыі.
На гэтым фоне Дональд Трамп заявіў, што ў Іране нібыта адбылася фактычная змена ўлады, а ЗША вядуць перамовы ўжо з «іншай групай людзей». Аднак незразумела, хто менавіта прадстаўляе іранскі бок і ці здольныя гэтыя людзі ўзгадняць пазіцыю ўнутры краіны.
У выніку Ірану становіцца ўсё цяжэй весці перамовы і каардынаваць свае дзеянні. Адсутнасць сувязі паміж кіраўнікамі можа яшчэ больш ускладніць як ваенныя рашэнні, так і магчымыя спробы дамовіцца пра спыненне канфлікту.
У МЗС Ірана заявілі, што не вядуць перамовы з ЗША
Трамп заявіў пра гатоўнасць завяршыць вайну з Іранам без адкрыцця Армузскага праліва
Трамп хоча, каб за вайну ЗША супраць Ірана заплацілі арабскія краіны
Іран за месяц вайны нарасціў экспарт нафты, адначасова абмежаваўшы канкурэнтаў
Трамп прыгразіў разбамбіць дазвання Іран, калі не будзе прагрэсу на перамовах
Каментары