Фільм – 1,5-гадзінны падман гледача. А Нікалас Кейдж вучыўся акторскаму майстэрству ў герояў кампутарных гульняў.
Прарок (Next)
ЗША, 2007, каляровы, 96 хв.
Рэжысэр: Лі Тамахоры
Ролі выконваюць: Нікалас Кейдж, Джуліана Мур, Джэсіка Біл, Томас Крэтчман, Торы Кітлз, Хасэ Дзуніга
Жанр: Фантастычны трымценьнік паводле раману Філіпа Дзіка
Адзнака: 4 (з 10)
Штукар з Лас-Вэгаса Крыс Джонсан здольны бачыць прышлае. Усяго толькі на дзьве хвіліны наперад, але гэтага дастаткова, каб ягоным дарам зацікавілася ФБР. Крыс уцякае ад агентаў і ад бандытаў і спрабуе наладзіць асабістае жыцьцё зь дзяўчынай, якую доўга чакаў, але ад свайго лёсу не ўцячэш…
Лі Тамахоры прачытаў Філіпа Дзіка, па раманам якога пастаўлены “Бягун па лязу брытвы” й “Узгадаць усё” – як агітку для “ворганаў” і кампутарную гульню з зашмальцаваным пэрсанажам.
Крыс Джонсан (Нікалас Кейдж) бачыць прышлае – і праігрывае яго ў сваёй галаве. Разнастайныя варыянты напачатку могуць забаўляць, як няўдалае заляцаньне лузэра да прыгажуні (сцэна ў камплекце ёсьць) – але хутка прыядаюцца. Герой ведае, куды трапіць куля, калі выбухне бомба і што рабіць, каб уцячы ад пагоні. Спачуваць такому герою немагчыма – нават, калі няшчаснага катуе Джуліяна Мур, паставіўшы небараку ў вочы распоркі (скрадзена ў “Заваднога апэльсіна” Стэнлі Кубрыка).
Але можна разглядаць героя, як кампутарны пэрсанаж.
Спрыяе гэтаму й Нікалас Кейдж, які пэўна браў ўрокі майстэрства ў герояў кампутарных гульняў. Лірычна-празорлівы твар, празорліва-няшчасны твар… – хопіць, больш ня трэба!
Фінальная “падстава” – проста дабівае. Лабавая аднамерная мараль – “усе штукары на супрацу з ворганамі!” – гэта яўна не Філіп Дзік. І нават не галівудзкі трымценьнік. На БТ, калі ласка, у “Сельскі час”!
Але, калі “падставаў” не заўважаць, – то фільм падасца нармальным сярэднім баевічком.
Цяпер чытаюць
На мітынгу ў Вільні затрымалі правакатара. А Ціханоўскі заявіў пра намер дабівацца сустрэчы з Зяленскім1
Каментары