Спорт
Галоўнага трэнэра футбольнай зборнай адправілі ў адстаўку
4 чэрвеня ў Эстоніі беларуская дружына ў мірным сутыкненьні атрымала ад гаспадароў дзьве «сухія» пстрычкі. Параза на ўзьбярэжжы Фінскай затокі сталася трэцім запар «абломам» зборнай краіны ды 29-м за ўсю гісторыю нашага футболу.
Ужо праз два дні, у аўторак, кіраўніцтва Беларускай фэдэрацыі футболу зьляцелася на пазачарговае пасяджэньне. Стала зразумела — галоўнаму трэнэру зборнай Сяргею Бароўскаму ня вытрымаць атакі авіяцыі прэзыдэнта Фёдарава.
Бароўскі другі раз прыйшоў у зборную паўгады назад. З той пары каманда правяла чатыры гульні, зь якіх тры сустрэчы былі таварыскімі (з баўгарамі, андорцамі ды эстонцамі — 1:4, 0:2, 0:2), ды толькі адна — у рамках адборачнага цыклю чэмпіянату Эўропы. Той матч з італьянцамі беларусы зьвялі ўнічыю, ня даўшы забіць грознай «Skuadry adzurry».
Спадары з выканкаму БФФ выключна разьбіраюцца ў спорце, калі робяць высновы пра працу трэнэра з таварыскіх гульняў! Раптоўныя перамены практычна пазбаўляюць нацыянальную дружыну шанцаў на посьпех у верасьнёўскім старце супраць валійцаў...
...Два тыдні назад, калі «Славія» выйграла Кубак Беларусі, на стадыёне «Дынама» для ўдзелу ў цырымоніі ўзнагароджваньня зьявіўся наш футбольны кіраўнік. Трыбуны скандавалі «Далоў Фёдарава!»...Vox populi — vox dei.
Абавязкі галоўнага трэнэра зборнай пакуль выконвае Юры Пудышаў.
Богусь Біятлянёнак
За сэнсацыю!
Чэмпіянаты Эўропы і сьвету па футболе пакуль што абыходзяцца безь беларускіх камандаў. Але ж мы ну ніяк ня можам прапусьціць такія падзеі ды з захапленьнем сочым за футбольным шоў. За каго ж хварэюць беларусы? Ніводная зборная з постсавецкай прасторы не аказалася годнай фіналу EURO-2000. Суседзі-палякі таксама не атрымалі квіткоў у Бэльгію ды Галяндыю. Вось неяк прыкіпела душа да чэхаў. Нашых гістарычных саюзьнікаў і сымпатыкаў. З нашчадкамі Швэйка, бадай, змогуць пасупернічаць толькі славенцы. Думаецца, знойдзецца шмат аматараў пахварэць за бела-зялёную сэнсацыю. Як заўжды, на самым пачатку чэмпіянату хапае прагнозаў. Будзем пасьлядоўнымі ды прапануем наступны варыянт фіналу: Чэхія—Славенія. За сэнсацыю!
Богусь Біятлянёнак
Каментары