Паэткі Марына Куноўская, Вольга Роўная і Дыяна Балыка падалі ў суд на Анатоля Аўруціна, укладальніка зборніку «Сучасная расейская паэзія Беларусі», а таксама выдавецтва «Тэхнапрынт». Асноўная прэтэнзія — парушэньне аўтарскіх правоў: іх вершы паставілі ў анталёгію бяз згоды аўтарак.
Паэткі таксама настойваюць на тым, што належаць не да расейскай паэзіі, а да беларускай расейскамоўнай.
«Мая культурная і чалавечая прыналежнасьць — гэтай краіне. Я валодаю беларускай мовай, я скончыла беларускамоўнае аддзяленьне гістфаку БДУ, зьбіраюся ўступіць у Саюз беларускіх пісьменьнікаў. Пры публікацыях у расейскіх, украінскіх альманахах я стаўлю ўмову, каб пазначалі, што я зь Беларусі, зь Менску», — патлумачыла ў камэнтары «НН» Д.Балыка. Паэткі настойваюць на моўнай разнастайнасьці Беларусі й згадваюць як прыклад Міколу Гусоўскага, які пісаў на лаціне.
Справа скончылася 12 красавіка на стадыі дасудовага разгляду: адказчыкі пагадзіліся выплаціць кожнай з аўтарак па 190 тыс.руб. (10 базавых велічыняў — мінімальная кара, пазначаная ў заканадаўстве пра аўтарскія правы), хаця самі паэткі сьпярша настойвалі на 250 тыс. руб.
Д.Балыка задаволеная вынікамі: «Спадзяюся, гэтая справа навучыць выдаўцоў дбаць пра аўтарскія правы. Калі б з намі заключылі дамовы, дык ім давялося б плаціць значна менш — 10 даляраў, а не 100, бо ганарары за вершы ў Беларусі вельмі нізкія».
Аркадзь Шанскі
Цяпер чытаюць
Няўдалае тэхнічнае рашэнне дорага абышлося арганізатарам галасавання ў Каардынацыйную раду8
Каментары