Польскія вайскоўцы ля беларускай мяжы. Фота: Mінабароны Польшчы / Twitter

У сваім новым допісе ў Telegram Ягор Лебядок адказаў намесніку начальніка Генштаба Узброеных Сіл Беларусі Паўлу Муравейку. Муравейка наракаў на непрапарцыйнасць колькасці мігрантаў і польскіх вайскоўцаў на мяжы, перамяшчэнне да межаў цяжкага ўзбраення і браніраваных машын. «Гэта для чаго, каб змагацца з мігрантамі? Гэта супярэчыць логіцы і здароваму сэнсу». Муравейка выказаў меркаванне, што мэты польскіх вайскоўцаў ля беларускай мяжы — «толькі правакацыйныя».

— Логіка ў дзеяннях палякаў ёсць, Муравейка далёка не дурань і гэта ведае, — піша Лебядок. — Палякі пачалі нарошчваць сваю групоўку не ў адказ на проста пераходы мігрантаў, а з мэтай перадухіліць стандартны ланцужок эскалацыі, які яны чакалі ад Пуціна і Лукашэнкі:

  1. Інфармацыйная напампоўка насельніцтва і дэманізацыя ворага (Польшчы, са жніўня 2020);

  2. Рэалізацыя дэстабілізацыі абстаноўкі ў краіне-суперніцы і квазісілавых дзеянняў (перакідка мігрантаў на пачатку з разлікам на сацыяльна-палітычны крызіс да лета 2021, затым і сілавыя дзеянні з выкарыстаннем мігрантаў, плюс суправаджэнне дадатковымі пагрозамі — наркотыкі, джыхад, ядзерныя матэрыялы і г.д.);

  3. Узмацненне пагроз з мэтай дамагчыся прамежкавых палітыка-эканамічных выгад, ізаляцыі праціўніка на міжнароднай арэне («палякі парушаюць правы чалавека»), атрымання часу для разгортвання сіл і г.д.;

  4. Правакацыі для развязвання баявых дзеянняў і фарміравання ўласнага іміджу ахвяры/міратворца/абаронцы на міжнароднай арэне;

  5. Баявыя дзеянні.

Ведае выдатна такі варыянт эскалацыі і генерал Муравейка, паколькі беларускія вайскоўцы самі не раз такі ланцужок малявалі, паказваючы планы Захада заняволіць Беларусь.

Менавіта для перадухілення пунктаў 4, 5 і нарошчвалася польская групоўка, для павышэння боегатоўнасці і дэманстрацыі рашучасці.

Для дэманстрацыі рашучасці і сам Лукашэнка перакідваў войскі пад Гродна ў 2020-м, як і цяпер у вучэннях «Саюзная рашучасць 2022».

У кантэксце ўльтыматумаў Пуціна, пастаянных рухаў расійскіх войскаў і рыторыкі ў дачыненні да Украіны, палякі не прыбяруць створаную групоўку проста так. Паколькі яны з краінамі Балтыі на перадавой, то і казаць пра ўзмацненне бяспекі будуць гучней за ўсіх у НАТА, а не проста для «фінансавых укладанняў», і аб'ядноўваць намаганні.

Палявы выхад разведвальнага батальёна 11-й асобнай гвардзейскай механізаванай брыгады. Фота: Ян Гарбанюк / Ваяр

У адрозненне ад шэрагу супрацоўнікаў прапаганды, Муравейка ў тэме псіхалагічнага проціборства чалавек з вопытам і сістэмным поглядам, мінімум з 2008 года публікаваў артыкулы на гэтую тэму ў «Навука і ваенная бяспека» і «Ідэалагічныя аспекты ваеннай бяспекі». Тым лепш, калі такі чалавек заяўляе азначанае вышэй: па прыёмах падачы інфармацыі грамадскасці адразу зразумелыя сапраўдныя сутнасць і матывы дзеянняў беларускіх военачальнікаў.

Характар вучэнняў у дачыненні да Украіны і Польшчы будзе зразумелы па некаторых элементах, у прыватнасці, ці будзе дэсантаванне з вышынь 4 км і больш для адпрацоўкі засылкі дэсанту на дзясяткі кіламетраў праз мяжу на парашутных сістэмах незаўважна для СПА, ці будзе шырока прымяняцца інжынерная тэхніка для стварэння шляхоў перакідвання тэхнікі па малачаканых напрамках, ці перамесцяць расейскія С-400 з Гродна на поўдзень Беларусі, ці пакінуць іх там і далей, узмацненне ВПС і РЭБ, інш.

Рост вайсковых сіл паблізу Беларусі з усіх бакоў і агрэсіўная рыторыка ўсё больш штурхаюць Беларусь у рэгіянальную варонку эскалацыі са стандартным выхадам — праз вайну, — рэзюмуе Лебядок.

Сталі вядомыя тэрміны вайсковых беларуска-расійскіх вучэнняў «Саюзная рашучасць»

Калоны тэхнікі ў Слуцку і Калодзішчах: рыхтуюцца наступаць на Украіну? Аналізуем фота і відэа з вайскоўцамі

The New York Times: Расія пачала эвакуяваць сем’і дыпламатаў з Украіны

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?