5 lipienia ŭ «Falvarku «Dobryja myśli» (vulica Mahiloŭskaja, 12) adkryłasia vystava hrafiki viadomaha biełaruskaha mastaka Mikoły Kupavy «Postaci ziamli biełaruskaj», pryśviečanaja 125‑hodździu z dnia naradžeńnia narodnych paetaŭ Biełarusi Janki Kupały i Jakuba Kołasa.
U ekspazicyi pradstaŭlena 25 hrafičnych tvoraŭ (linaryt i kalarovaja litahrafija) — partrety Kupały i Kołasa, ilustracyi da ich tvoraŭ, a taksama vyjavy tych miascaŭ, što źviazany ź ich žyćciom i dziejnaściu. «Za 27 hadoŭ raboty nad hetaj temaj stvorana kala 50 rabot, pryśviečanych narodnym paetam Biełarusi. Dla mianie jany źjaŭlajucca baćkami nacyi, apostałami biełaruskaj kultury, jakija sfarmiravali samaśviadomaść nacyi i stajali la vytokaŭ biełaruskaha adradžeńnia. Ź ich imionami i tvorčaściu naradžajecca i pamiraje kožny sapraŭdny biełarus. Jubilej źjaŭlajecca šturškom dla taho, kab jašče raz pieračytać kłasikaŭ, skazać pra ich dobraje słova i štości zrabić u honar ich. Kupała i Kołas i siońnia dapamahajuć nam zmahacca i žyć», — zaznačyŭ M.Kupava.
Pavodle jaho słoŭ, z pačatku hetaha hoda vystava demanstravałasia ŭ adnoj ź viaskovych škoł Dziaržynskaha rajona i ŭ horadzie Stoŭpcy (Minskaja vobłaść), a zatym u Ńju‑Jorku (ZŠA) u carkvie Śviatoha Kiryły Turaŭskaha. Pryčym u Amierycy mastak pradstaviŭ pašyrany varyjant ekspazicyi, uklučyŭšy ŭ jaje raboty, pryśviečanyja vydatnym dziejačam biełaruskaj historyi i kultury — Usiasłavu Čaradzieju, Kiryle Turaŭskamu, Jeŭfrasińni Połackaj, Francysku Skarynie i Kanstancinu Astrožskamu, a taksama znamianalnym histaryčnym padziejam, u tym liku Aršanskaj bitvie 8 vieraśnia 1514 hoda pamiž vojskami Vialikaha kniastva Litoŭskaha i Maskoŭskaj dziaržavy. «Heta było zroblena śviadoma, bo Kupała i Kołas u sercy nasili hetyja padziei i miescy, a taksama pisali ab dziejnaści svaich vialikich prodkaŭ», — skazaŭ mastak.
Vystava budzie pracavać u Minsku da 12 lipienia. Zatym mastak płanuje pakazać jaje ŭ Oršy i Viciebsku.
Ciapier čytajuć
Tamara Vińnikava pradała svoj łondanski dom, zaviešany karcinami samoj siabie ŠMAT FOTA18
Kamientary