Amierykanskaja kampanija Hold Security, jakaja śpiecyjalizujecca ŭ halinie zabieśpiačeńnia infarmacyjnaj biaśpieki, śćviardžaje, što hrupie chakieraŭ z Rasii ŭdałosia skłaści najbujniejšuju ŭ śviecie bazu dadzienych parolaŭ i imionaŭ internet-karystalnikaŭ.
U masiŭ źviestak uvajšli 1,2 młrd vykradzienych parolaŭ i imionaŭ karystalnikaŭ, a taksama bolš za 500 młn elektronnych adrasoŭ. Hetaja infarmacyja była atrymana z 420 tys. internet-sajtaŭ, śćviardžaje kampanija.
Hold Security nazvała heta «najbujniejšym kradziažom źviestak u historyi».
Hold Security nie nazyvaje imionaŭ paciarpiełych, spasyłajučysia na damovu pra nierazhałošvańnie i niežadańnie vydać kampanii, čyje sajty ŭsio jašče zastajucca ŭraźlivymi.
«Ich metaj byli nie tolki bujnyja kampanii, jany źbirali dadzienyja z usich sajtaŭ, na jakija zachodzili ich achviary», — skazana ŭ dakładzie kampanii.
Pieršaj napisała ab hetaj najbujniejšaj uciečcy źviestak amierykanskaja hazieta New York Times. Jana paviedamiła, što pa jaje prośbie ekśpiert, jaki nie maje dačynieńnia da Hold Security, praanalizavaŭ skradzienyja źviestki i paćvierdziŭ ich sapraŭdnaść.
«Inšy ekśpiert pa kampjutarnych złačynstvach aznajomiŭsia z dadzienymi, ale nie moh abmiarkoŭvać ich publična. Jon skazaŭ, što niekatoryja vialikija kampanii viedali, što źviestki ab ich byli siarod vykradzienaj infarmacyi», — paviedamlaje hazieta.
U artykule śćviardžajecca, što ŭ hrupu chakieraŭ ŭvachodziać kala dziasiatka čałaviek va ŭzroście prykładna 20 hadoŭ, jakija viedajuć adzin adnaho asabista. Ich sierviery mieściacca ŭ Rasii.
Hold Security, jakaja raniej paviedamiła ab napadach na kampanii Adobe i Target, skazała, što joj spatrebiłasia siem miesiacaŭ dla taho, kab praanalizavać maštaby hetych napadaŭ.
U vice-śpikierki Kaardynacyjnaj rady Lizaviety Prakopčyk sabrałasia $12 tysiač daŭhoŭ103
Kamientary