U Biełarusi ŭśled za Rasijaj zabaranili prakat filma pra zabojstvy dziaciej u stalinskim SSSR 

U Rasii admienieny prakat filma «Dzicia №44» za dzień da zapłanavanaha relizu filma ŭ kinateatrach. Film «Dzicia №44» (u aryhinale Child 44, prakatnaja nazva ŭ Biełarusi «Numar 44») raskazvaje historyju pra aficera savieckaj vyviedki Lva Dziamidava, jaki rasśleduje sieryjnyja zabojstvy dziaciej u 1952 hodzie. Film źniaŭ šviedski režysior Daniel Eśpinosa, hałoŭnyja roli vykanali Tom Chardzi, Hery Ołdmen, Numi Rapas.

Rasijski prakatčyk filma «Centrał Partnieršyp» i Minkult Rasii zajavili, što film pazbaŭleny prakatnaha paśviedčańnia, bo niedakładna pieradaje histaryčnyja padziei.

«Pa vynikach pres-prahladu ŭ Ministerstva kultury RF pastupili pytańni, jakija tyčacca źmiestu filma, u pieršuju čarhu skažeńnia histaryčnych faktaŭ i svojeasablivych traktovak padziej da, padčas i paśla Vialikaj Ajčynnaj vajny, a taksama vobrazaŭ i charaktaraŭ savieckich hramadzian toj histaryčnaj epochi. […] Paśla dadzienaha prahladu mierkavańnie prakatčykaŭ i pradstaŭnikoŭ Minkultury supali: prakat padobnaha rodu filmaŭ napiaredadni 70-hodździa Pieramohi niedapuščalny», — havorycca ŭ sumiesnaj zajavie «Centrał Partnieršyp» i Ministerstva kultury Rasii.

Piśmieńnik Tom Rob Śmit, čyj biestseler «Dzicia №44» staŭ asnovaj dla filma, zajaviŭ, što na napisańnie ramana jaho padšturchnuli złačynstva Andreja Čykaciła. Adnak jon taksama pryznaŭsia, što adnym z «hałoŭnych hierojaŭ źjaŭlajecca savieckaja Rasija — žudasnaja sumieś žachu i absurdu». 

Jak paviedamlaje tut.by, u Biełarusi film taksama nie vyjdzie na ekrany, choć niekalki hadzin tamu «Našaj Nivie» va UP «Kinavideaprakat» Minharvykankama jašče paćvierdzili fakt premjery, jakaja čakałasia 16 krasavika.

Stužka nie budzie demanstravacca i ŭ pryvatnaj sietcy Silverscreen.

Jak raspavioŭ Vasil Koktyš, hienieralny dyrektar unitarnaha pradpryjemstva «Kinavideaprakat», rašeńnie zabaranić da pakazu film u Biełarusi pryniaŭ rasijski bok — kampanija «Centrał Partnieršyp». Pa damovie z dystrybjutaram UP «Kinavideaprakat» moža vystavić štrafnyja sankcyi za zryŭ pakazu, adnak rabić hetaha nie budzie, bo strat pradpryjemstva nie paniesła.

Pa słovach Koktyša, film nie mieŭ kamiercyjnaha patencyjału, pakazvać jaho płanavali na praciahu tydnia ŭ piaci kinateatrach stalicy.

«U «Domie kino» było dva kvitki pradadziena, u «Biełarusi» vosiem kvitkoŭ, u «Aŭrory» naohuł prodažaŭ nie było. Strat niama, ale hetaj zabaronaj stvaryli ažyjataž, i ciapier film buduć masava hladzieć u internecie», — zaŭvažyŭ jon.

• 0
• 0
• 0
• 0
• 0
• 0
• 0
• 0