Biełaruski hurt Litesound padaŭ zajaŭku na ŭdzieł u adboračnym konkursie «Jeŭrabačańnie» ad Małdovy, paviedamiŭ baćka bratoŭ Karakinych Jury. Jany vystupajuć trya z małdaŭskaj śpiavačkaj Katherin. Razam vykanajuć pieśniu Imagine, słovy i muzyku da jakoj napisali Dźmitryj i Uładzimir Karakiny.
Adbor u inšych krainach adroźnivajecca ad Biełarusi, tamu ciažka skazać, jaki budzie vynik, kaža Juryj Karakin. Pakul hurt padaŭ zajaŭku i nieŭzabavie projdzie pieršaje prasłuchoŭvańnie.
— Ad Biełarusi ŭžo adzin raz pradstaŭlalisia, navošta bolš. Treba pasprabavać svaje siły ŭ inšym miescy, — prakamientavaŭ vybar hurtu Jury Karakin. Pavodle jaho słoŭ, paśla ŭdziełu ŭ «Jeŭrabačańni» ad Biełarusi hrupa Litesound praktyčna zabaronienaja, hrupu vyklučajuć z televizijnych kancertaŭ.
— Prosta vyhaniajuć ź Biełarusi, tamu hrupa ŭ asnoŭnym vystupaje za miažoj. Padčas adnaho z vystupaŭ paznajomilisia z Katherin i pačałasia sumiesnaja tvorčaja praca. Zdałosia cikavym spałučeńnie hałasoŭ, a potym akazałasia, što pa ŭmovach konkursu ŭ Małdovie, važna, kab u składzie byŭ hramadzianin krainy. Umovy vykananyja, pieśnia spadabałasia, i heta čarhovy cikavy ekśpierymient dla hurtu, — tłumačyć Juryj Karakin.
Hanieńni hrupy jon źviazvaje z pomstaj čynoŭnikaŭ, jakija atrymali vymovu za niapravilny padlik hałasoŭ i «na praciahu troch hadoŭ pomściać za heta».
Pieramozie Litesound na «Jeŭrafeście» papiaredničaŭ skandał. Spačatku ŭ finale konkursu «Jeŭrafest» pieramahła Alona Łanskaja. Adnak paźniej vyśvietliłasia, što vyniki byli padtasavanymi, pra što zajaviŭ Alaksandr Łukašenka na naradzie pa vynikach praviadzieńnia finału Nacyjanalnaha televizijnaha muzyčnaha prajekta «Jeŭrafest».
— Jak mianie infarmujuć ŭžo dźvie hrupy, jakija pa maim daručeńni hetym zajmalisia, vyniki finału konkursu apynulisia padtasavanymi. Nie viedaju, navošta i čamu. Heta my raźbiaremsia, kali nie tut, to ŭ miežach kryminalnaj spravy. Prabačeńnia nikomu nie budzie. Tamu ja prapanuju vam nie ciamnić, - skazaŭ tady prezident.
Paśla adnaŭleńnia spraviadlivaści ŭ padliku hałasoŭ na «Jeŭrabačańnie-2012» pajechaŭ Litesound. Na konkursie jany vykanali pieśniu «We Are The Heroes» («My — hieroi»), ale nie prajšli ŭ finał «Jeŭrabačańnia».
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2020
Kamientary