Za studzień—lipień 2016 hoda abjom pramysłovaj vytvorčaści ŭ Biełarusi, pavodle danych aficyjnaj statystyki, skłaŭ 45,1 młrd. denaminavanych rubloŭ i źniziŭsia na 2% u paraŭnańni z anałahičnym pieryjadam 2015 hoda.
U studzieni—červieni adstavańnie ad letašniaha pakazčyka składała 1,6%, u studzieni—mai — 1,9%, u studzieni—krasaviku — 2,5%, u studzieni—sakaviku — 4,3%, u studzieni—lutym — 5,6%, u studzieni — 6,8%.
Pa vynikach siami miesiacaŭ źnižeńnie abjomu vypuskanaj pramysłovaj pradukcyi zafiksavanaje: u vytvorčaści koksu i praduktaŭ naftapierapracoŭki — na 3,1%; u vytvorčaści chimičnych praduktaŭ — na 10,7%; u vytvorčaści humovych i płastmasavych vyrabaŭ — na 8,9%; u mietałurhii — na 4,8%; u vytvorčaści transpartnych srodkaŭ i abstalavańnia — na 2,7%; u zabieśpiačeńni elektraenierhijaj, hazam, paraj, haračaj vadoj i kandycyjanavanym pavietram — na 2,7%; u vodazabieśpiačeńni — na 7,6%.
Tym nie mienš u šerahu halin pramysłovaści abjom pramysłovaj vytvorčaści za siem miesiacaŭ biahučaha hoda pieravysiŭ uzrovień anałahičnaha pieryjadu 2015 hoda: u hornazdabyŭnoj — na 0,6%, charčovaj pramysłovaści — na 1,1%, vytvorčaści tekstylnych vyrabaŭ, adzieńnia, vyrabaŭ sa skury i futra — na 3,3%; vytvorčaści vyrabaŭ z dreva i papiery, palihrafičnaj dziejnaści i tyražavańni zapisanych nośbitaŭ infarmacyi — na 9,1%, asnoŭnych farmaceŭtyčnych praduktaŭ i farmaceŭtyčnych preparataŭ — na 5,5%, vytvorčaści elektraabstalavańnia — na 7,8%, u vytvorčaści vyličalnaj, elektronnaj i aptyčnaj aparatury — na 1,9%, mašyn i abstalavańnia — na 8,4%.
Vice-premjer Uładzimir Siamaška, vystupajučy na Biełaruskim pramysłovym forumie ŭ krasaviku hetaha hoda, vykazaŭ zdahadku, što da kanca hoda pramysłovaść vyjdzie z fazy padzieńnia. «My niedaciahvajem pakul da 100%. Ale treba adznačyć, što pry hetym ź miesiaca ŭ miesiac pramysłovaść dadaje pa 1,5%. Tamu jość nadzieja, što na zadańnie hetaha hoda (temp rostu bolš za 100%) my vyjdziem, a značyć, i vyjdziem z recesii», — zajaviŭ čynoŭnik.
Spad pramysłovaj vytvorčaści jon patłumačyŭ upłyvam u pieršuju čarhu źniešnich faktaraŭ: «Biełaruś — kraina z adkrytaj ekanomikaj, kali 65% VUP pradajecca na źniešnija rynki, i nie moža nie zaležać ad źniešnich faktaraŭ, kali ŭ śviecie adbyŭsia kryzis, kali ŭ Rasii, na našym asnoŭnym rynku, rubiel abvaliŭsia, popyt na našu pradukcyju źniziŭsia».
Pry hetym Siamaška pryznaŭ, što admoŭnyja pakazčyki raboty pramysłovaści abumoŭlenyja ŭ tym liku niekankurentazdolnaściu biełaruskaj pramysłovaj pradukcyi na inšych (akramia rasijskaha) rynkach zbytu. «Taja pradukcyja, jakuju šmat hadoŭ my pastaŭlali na rynki postsavieckaj prastory, nie stała bolš zapatrabavanaj na inšych rynkach. Heta adbyłosia z-za taho, što nie ŭsie pradpryjemstvy zajmalisia inavacyjnaj i inviestycyjnaj dziejnaściu, šmat u kaho asnoŭnyja fondy zastalisia znošanymi. Heta i adbiłasia na prablemach, ź jakimi siońnia sutykajemsia», — adznačyŭ jon.
Kamientary