«Jaki ty ruski?!» Biełarus u Krymie źbiŭ armianina za toje, što ŭ taho doŭhija vałasy. I tamu što padobny da homaseksuała
Daniiła Bahdanava vyrašyli navat nie sadžać — situacyja ž zvyčajnaja.
U akupavanaj Jałcie za chulihanstva asudzili biełarusa Daniiła Bahdanava. Sudździa abmiežavałasia ŭmoŭnym terminam.
Historyja adbyłasia ŭ śniežni 2024‑ha kala kramy «Favaryt» u pasiołku Livadyja pad Jałtaj. Bahdanaŭ razam z dvuma znajomymi — usie troje pjanyja — padyšli da pradaŭca, maładoha čałavieka z doŭhimi vałasami i baradoj. Chłopiec, jak vyśvietliłasia padčas pracesu, — hramadzianin Rasii, ale jaho baćka — armianin.
Kampanii heta nie spadabałasia. Spačatku čaplalisia da pryčoski — «zaraz abrežam», potym pačali sumniavacca ŭ aryjentacyi, a skončyli nacyjanalnym pytańniem: «Jaki ty ruski?!» — kryčali jamu, dadajučy, pavodle śviedčańniaŭ maci paciarpiełaha, i słova «čurka».
Słoŭnaja pierapałka pierarasła ŭ bojku. Bahdanaŭ pieršym udaryŭ chłopca kułakom u tvar, potym kinuŭ jaho pryjomam na asfalt i razam ź siabram nanios, jak padličyŭ sud, kala dvaccaci ŭdaraŭ — kułakami i nahami pa hałavie i tułavie.
Za paciarpiełaha zastupiŭsia vypadkovy prachožy, 68‑hadovy mužčyna ŭ matacykletnym šlemie, kiraŭnik narodna-vakalnaha ansambla. Jaho za heta źbili taksama: siabar Bahdanava pavaliŭ jaho na ziamlu i niekalki razoŭ udaryŭ nahoj pa hałavie — šlem tresnuŭ, a samomu paciarpiełamu paśla bojki pahoršyŭsia zrok i pačałasia biessań.
Spyniła bojku tolki tryvožnaja knopka: pradaviec vyklikaŭ Rashvardyju, maci — palicyju. Zatrymanych, pavodle śviedak, ahresaraŭ daviałosia jašče i supakojvać — jany maciukalisia na palicyjantaŭ i prachožych, pakazvali siaredni palec.
Usio zdareńnie trapiła na kamieru nazirańnia mahazina. Bahdanaŭ paznaŭ siabie na videa, napisaŭ jaŭku z pavinnaj, całkam pryznaŭ vinu. Paźniej jon paprasiŭ prabačeńnia ŭ źbitaha armianina.
Sud kvalifikavaŭ dziejańni biełarusa pavodle častki 2 artykuła 213 Kryminalnaha kodeksa Rasii — «chulihanstva, źviazanaje z supracivam asobie, jakaja spyniaje parušeńnie hramadskaha paradku». Heta ciažkaje złačynstva, jakoje praduhledžvaje da piaci hadoŭ źniavoleńnia.
Adnak sudździa pryznačyła Bahdanavu hod i šeść miesiacaŭ umoŭna, z takim ža vyprabavalnym terminam. Z abaviazkaŭ — raz na miesiac adznačacca ŭ inśpiekcyi.
Pra što maŭčyć Alaksiej Franckievič, jakomu Polšča zakryła ŭjezd na 10 hadoŭ67
Kamientary