Panamski kanał abmialeŭ praz El-Nińjo. Praź jaho buduć prapuskać mienš sudnaŭ
Administracyja Panamskaha kanała vyrašyła skaracić kolkaść sudnaŭ, jakija mohuć prachodzić praz adzin z najvažniejšych vodnych šlachoŭ śvietu. Pryčyna — niedachop apadkaŭ i źnižeńnie zapasaŭ vady, źviazanyja z El-Nińjo, piša Bi-bi-si.
Z 15 vieraśnia praz kanał zmohuć prachodzić 32 sudny ŭ sutki zamiest ciapierašnich 36. Novyja abmiežavańni pačnuć uvodzić paetapna z 3 vieraśnia.
Ułady Panamy tłumačać rašeńnie nieabchodnaściu zachavać nadziejnaść pracy kanała i zapasy presnaj vady dla nasielnictva. Niahledziačy na pačatak siezona daždžoŭ u Centralnaj Amierycy i ŭžo pryniatyja miery pa ekanomii vady, administracyja ličyć dadatkovyja abmiežavańni nieabchodnymi dla doŭhaterminovaj stabilnaści sudnachodstva.
Panamski kanał maje vialikaje značeńnie dla suśvietnaha handlu, bo istotna skaračaje adlehłaść i čas pieravozak pamiž Atłantyčnym i Cichim akijanami. Štohod praź jaho prachodziać kala 14 tysiač sudnaŭ. Kanał pracuje kruhłasutačna na praciahu ŭsiaho hoda i prynosić Panamie kala 3 miljardaŭ dalaraŭ dachodu štohod.
Sioletnija prablemy źviazvajuć z El-Nińjo — pieryjadyčnym pavyšeńniem tempieratury pavierchnievych vod Cichaha akijana, jakoje ŭpłyvaje na nadvorje ŭ roznych rehijonach śvietu. Pavodle prahnozaŭ, sioletni El-Nińjo moža stać adnym z samych mocnych za ŭsiu historyju nazirańniaŭ. Jaho nastupstvy mohuć zakranuć sielskuju haspadarku, charčovyja pastaŭki i suśvietnuju ekanomiku.
Padobnaja situacyja ŭžo ŭźnikała ŭ 2023 hodzie. Tady praz zasuchu ŭ Panamie ŭłady taksama byli vymušanyja abmiežavać kolkaść sudnaŭ, jakija prachodzili praz kanał. Paśla hetaha administracyja pryniała miery, jakija dazvolili skaracić raschod vady.
Novyja abmiežavańni ŭźnikajuć na fonie inšych prablem u suśvietnym sudnachodstvie. Vajna ź Iranam užo pryviała da surjoznych pierabojaŭ u pieravozkach i skaračeńnia kolkaści sudnaŭ, jakija vykarystoŭvajuć stratehična važny Armuzski praliŭ. Abmiežavańni ŭ Panamskim kanale mohuć dadatkova pavialičyć cisk na hłabalnyja łancužki pastavak.
Panamski kanał maje taksama važnaje hieapalityčnaje značeńnie. Jaho pabudavali pieravažna na amierykanskija srodki i aficyjna adkryli ŭ 1920 hodzie. Doŭhi čas jon znachodziŭsia pad kantrolem ZŠA, ale ŭ 1999 hodzie poŭnaje kiravańnie kanałam było pieradadziena Panamie.
Donald Tramp u pačatku svajho druhoha prezidenckaha terminu zajaviŭ pra mahčymaść viartańnia kanała pad kantrol ZŠA. Jon śćviardžaŭ, što za vysokimi taryfami dla amierykanskich sudnaŭ i ŭpłyvam na infrastrukturu kanała staić Kitaj. Prezident Panamy Chase Raul Mulina heta admaŭlaŭ, padkreślivajučy, što kanał nie kantralujecca ni Kitajem, ni ZŠA, ni Jeŭrasajuzam.
U 2025 hodzie pad ciskam administracyi ZŠA hankonhski chołdynh CK Hutchison abviaściŭ ab pieradačy 90% doli ŭ Panama Ports Company kansorcyumu na čale z amierykanskaj inviestycyjnaj kampanijaj BlackRock.
Rekordnaje abmialeńnie Dunaja ahaliła padmurki mosta impieratara Kanstancina Vialikaha — najdaŭžejšaha mosta antyčnaści
Pahladzicie, jak abmialeła Prypiać u Mazyry
U Rymie praz zasuchu stali bačnyja apory staražytnarymskaha mosta
Z-za abmialełaha Dunaja Rumynija spyniła pracu svajoj adzinaj AES
Rejn pastaviŭ rekord abmialeńnia za ŭsiu historyju nazirańniaŭ
Ciapier čytajuć
Pra što maŭčyć Alaksiej Franckievič, jakomu Polšča zakryła ŭjezd na 10 hadoŭ39
Kamientary