Internet abmiarkoŭvaje zahadkavy ŭkaz Łukašenki pra kontrterarystyčnyja apieracyi, jaki daje rasijskamu śpiecnazu prava dziejničać u Biełarusi
Biełaruski internet abmiarkoŭvaje zahadkavy ŭkaz Łukašenki ad 6 śniežnia №446 «Ab prajekcie mižnarodnaj damovy», jaki apublikavany na sajcie Pravo.by.
Tekst praduhledžvaje pahadnieńnie pamiž Biełaruśsiu i Rasijskaj Fiederacyjaj ab udziele padraździaleńniaŭ śpiecyjalnaha pryznačeńnia ŭ kontrterarystyčnych apieracyjach, jakija pravodziacca na terytoryi Respubliki Biełaruś abo Rasijskaj Fiederacyi.
Pry hetym havorka viadziecca pra ŭžo hatovy prajekt (tekst nie apublikavany), jaki musić padpisać biełaruski KDB.
Apublikavańnie hetaha ŭkaza vyklikała paniku ŭ biełaruskich sacyjalnych sietkach i na niekatorych sajtach.
U pryvatnaści, u supołcy «Taktyčnaj hrupy «Biełaruś» źjaviłasia paviedamleńnie, što hety ŭkaz uzakonić znachodžańnie rasijskich vojskaŭ na terytoryi Biełarusi, što aznačaje zdaču suvierenitetu.
Žurnalist Andrej Pačobut taksama napisaŭ, što hety dakumient — faktyčnaja lehalizacyja prysutnaści «zialonych čałaviečkaŭ», pryčym demanstratyŭna: maŭlaŭ, hramadskaść prainfarmavanaja śviadoma.
Niekatoryja ŚMI miarkujuć, što biełaruskich vajskoŭcaŭ ciapier mohuć adpravić u haračyja punkty na terytoryi Rasii.
Ale jak jano jość nasamreč?
Jak patłumačyli «Našaj Nivie» krynicy, blizkija da śpiecsłužbaŭ, havorka idzie pra zamacavańnie techničnych aśpiektaŭ uzajemadziejańnia śpiecsłužbaŭ u asablivych vypadkach.
«Ujavicie situacyju, nie daj Boh, što naš samalot u aeraporcie Maskvy zachoplivaje niejkaja terarystyčnaja hrupoŭka. Pa normach mižnarodnaha zakanadaŭstva, terytoryja pavietranaha sudna — heta terytoryja Biełarusi. Kab kontrterarystyčnyja padraździaleńni RF mahli ažyćciaŭlać apieracyi ŭ takich vypadkach — a siužety mohuć być absalutna roznyja, samalot tolki prykład, — to dla hetaha takija damovy i zaklučajucca, a pieryjadyčna — pierazaklučajucca», — patłumačyła nam krynica.
Zdahadki pra toje, što biełaruskich vajskoŭcaŭ zaraz zmohuć pasyłać u haračyja punkty ŭ Rasiju taksama nie majuć pad saboju padstaŭ: u prajekcie damovy havorka idzie pra KDB i toj śpiecnaz, jaki ŭ padparadkavańni hetaha viedamstva. A siły śpiecyjalnych apieracyj Biełarusi znachodziacca ŭ jurysdykcyi Ministerstva abarony — ich vykarystańnie rehulujecca inšymi dakumientami.
Kiraŭnik analityčnaha prajekta Belarus Security Blog Andrej Parotnikaŭ taksama nie padzialaje panikiorskich nastrojaŭ internet-supolnaści.
«Takija damovy — zaviedzienaja mižnarodnaja praktyka, — skazaŭ Parotnikaŭ. — Jany zvyčajna praduhledžvajuć niekalki punktaŭ: ałharytm źviartańnia pa dapamohu bakoŭ pahadnieńnia ŭ vypadku terarystyčnaj ahresii, pieralik ci vyznačeńnie situacyj, kali taki zvarot budzie razhladacca — nie kožny vypadak padpadaje pad takoje pahadnieńnie. Treci momant — sistema kiravańnia apieracyjaj, zvyčajna heta nacyjanalny režym — zamiežnyja siły padparadkoŭvajucca tym strukturam, jakija stvarajucca zhodna z unutranym antyterarystyčnym zakanadaŭstvam (u Biełarusi heta KDB). Čaćviorty momant — uvoz uzbrajeńnia i śpiectechniki, rehłamient ich vykarystańnia. Nu i jašče tam prapisvajecca adkaznaść u takich vypadkach, kali ciaham antyterarystyčnaj apieracyi cierpić cyvilnaje nasielnictva albo majomaść trecich asobaŭ — zvyčajna zamiežnyja ŭdzielniki vyzvalajucca ad luboj adkaznaści, jaje niasie ŭrad prymajučaha boku».
Parotnikaŭ dadaŭ, što zhodna z suśvietnaj praktykaj, lubyja zamiežnyja ŭdzielniki antyterarystyčnaj apieracyi mohuć prybyvać u krainu tolki pa zaprašeńni ŭrada, luby inšy farmat źjaŭleńnia — heta interviencyja.
Inšy vajskovy ekśpiert, Alaksandr Alesin, źviarnuŭ uvahu «Našaj Nivy» na toje, što tearetyčna, pavodle damovaŭ ADKB, brać udzieł u antyterarystyčnaj apieracyi na terytoryi Biełarusi mohuć navat śpiecsłužby niekatorych krain Azii, tamu damova, jakaja napałochała internaŭtaŭ — heta naadvarot pazityŭny momant, bo jana budzie rehulavać uzajemadziejańnie siłavikoŭ u krytyčnaj situacyi, kali ŭsie ałharytmy musiać pracavać biez pramarudžvańnia.
«Padrychtoŭki da «zialonych čałaviečkaŭ» ja tut nie baču, — skazaŭ Alesin. — Zvyčajna, kali chočuć raspačać hibrydny kanflikt, to ŭ prymajučaha boku nie pytajucca. Siońnia biełaruskaje vyšejšaje kiraŭnictva sprabuje dystancyjanavacca ad sumnieŭnych inicyjatyŭ Rasii, naŭrad ci Łukašenka padpiša damovu ŭ škodu sabie, jakaja pachiśnie jurysdykcyju biełaruskaha ŭrada na terytoryi Biełarusi».
* * *
Paźniej infarmacyja budzie dapoŭniena aficyjnym kamientarom kampietentnych orhanaŭ.
Dziadok patłumačyŭ, čamu vyzvalili mienavita tych palitviaźniaŭ, kaho vyzvalili31
Kamientary