Rabotnika vahonnaha depo stancyi Barysaŭ abvinavačvajuć va chabarach i machlarstvie. Pa viersii śledstva, supracoŭnik braŭ hrošy z padnačalenych za padaŭžeńnie kantraktu, ich prahuły i inšyja praviny. Padrabiaznaści paviedamlaje ŭpraŭleńnie Śledčaha kamiteta pa Minskaj vobłaści.
Fihurant — majstar punkta techabsłuhoŭvańnia Minskaha vahonnaha depo stancyi Barysaŭ.
Śledčyja miarkujuć, što na praciahu niekalkich hadoŭ majstar padbuchtorvaŭ rabotnikaŭ da dačy chabaru nibyta vyšejstajačamu kiraŭnictvu. Za hetyja hrošy supracoŭniki chacieli paźbiehnuć mahčymych prablem z-za prahułaŭ i inšych pravin.
«Tak, za niepryciahnieńnie da dyscyplinarnaj i administracyjnaj adkaznaści padnačalenaha, jaki znachodziŭsia na pracoŭnym miescy ŭ stanie ałkaholnaha apjanieńnia, atrymaŭ u jakaści chabaru 200 dalaraŭ ZŠA», — raspaviadaje aficyjny pradstaŭnik USK vobłaści Taćciana Biełanoh.
Ad jašče adnaho rabotnika, miarkuje śledstva, fihurant atrymaŭ 750 dalaraŭ za padaŭžeńnie kantraktu. Majstar i tut vystaŭlaŭ siabie nibyta pasiarednikam.
Dziejańni mužčyny kvalifikavanyja adrazu pa čatyroch artykułach Kryminalnaha kodeksa: machlarstva, padbuchtorvańnie da dačy chabaru, atrymańnie chabaru, słužbovy padłoh.
Fihurant zaklučany pad vartu. Sprava pieradadzienaja prakuroru dla nakiravańnia ŭ sud.
«Śledstvam uniesienaje pradstaŭleńnie ab likvidacyi pryčyn i ŭmoŭ, jakija sadziejničali ŭčynieńniu karupcyjnych złačynstvaŭ na dziaržaŭnym pradpryjemstvie», — raspaviali va USK.
Ciapier čytajuć
Maniekien dziaŭčynki na vakzale ŭ Minsku napałochaŭ i naśmiašyŭ sacsietki5
Kamientary