Archieolahi znajšli stalicu chazaraŭ

Rasiejskija archieolahi ćvierdziać, što znajšli stalicu Chazarskaha kahanatu. Da hetkaj sensacyjnaj vysnovy jany pryjšli paśla taho, jak padčas raskopak haradzišča la siała Samaździełka Kamyziackaha rajonu Astrachanskaj vobłaści pad nievialičkim haradkom załataardynskaha času natrapili na bujniejšaje j raniejšaje pa časie pasielišča.

Samym mocnym arhumentam archieolahaŭ Samaździelskaj ekspedycyi stali reštki krepaści, zbudavanaj z cehły, što, pavodle słoŭ zahadčyka navukova-architekturnaj labaratoryi Astrachanskaha dziaržaŭnaha ŭniversytetu Dźmitryja Vasiljeva, było carskim pryvilejem.

Radyjevuhlarodny analiz vyznačyŭ, što znachodki naležać VIII i ICH stahodździam — časam roskvitu kahanatu. Narešcie, znojdzieny ślady pažaru, jaki archieolahi źviazvajuć z pachodam kijeŭskaj družyny kniazia Śviatasłava ŭ druhoj pałovie 960‑ch hadoŭ.

Zrešty, «dakazać na sto adsotkaŭ, što znojdzieny horad — mienavita Ityl, niemahčyma budzie nikoli… bo my ž nia zmožam znajści šyldačku z nadpisam «Horad Ityl», — kaža Dźmitryj Vasiljeŭ.

Dahetul ličyłasia, što stalica Chazarskaha kahanatu nazaŭždy źnikła pad chvalami Kaśpijskaha mora.

Choć pra historyju chazarskaj dziaržavy viadoma niamała, dahetul niama adzinaje dumki pra miežy kahanatu. Razmytyja nia tolki hieahrafičnyja, ale j archiealahičnyja miežy: ułasna chazarskich znachodak vobmal. Da ŭsiaho, u kahanacie žyli jak asiełyja, tak i kačavyja narody, i ŭ raskapanych pasieliščach źmiašanyja pradmiety hetych napadobnych adna da adnoj kultur.

Historyjaj chazarskaj dziaržavy archieolahi cikavilisia zdaŭna. U pieršaj pałovie minułaha stahodździa viałosia vyvučeńnie haradziščaŭ, jak miarkujecca, bujnych chazarskich haradoŭ Semenderu, Sarkiełu j Belendžeru. Pryčym, pieršyja dva siońnia zatopleny štučnymi vadaschoviščami. Sarkieł, ź jakim asacyjavali Cymlanskaje haradzišča, ciapier lažyć pad vadoj u Cymlanskim vadaschoviščy. Belendžer, jaki, mahčyma, znachodziŭsia na Vierchniečyrurtaŭskim haradziščy, zatoplenym padčas budaŭnictva Sułackaj HES.

Chazary — napaŭkačavy turkamoŭny narod, jaki źjaviŭsia ŭ Paŭdniova-Ŭschodniaj Eŭropie ŭ IV stahodździ j praisnavaŭ da CHI st. U ICH radzimičy, praź ziemli jakich prachodziŭ handlovy šlach z kaśpijskaha rehijonu ŭ Eŭropu, byli ŭ zaležnaści ad chazaraŭ i płacili im daninu. Chazarski kahanat byŭ pieršaj dziaržaŭnaj farmacyjaj na ŭschodzie Eŭropy. Ad ICH stahodździa ŭ im była dziaržaŭnaj judejskaja relihija.

Pavodle Lenta.Ru

• 0
• 0
• 0
• 0
• 0
• 0
• 0
• 0