U ZŠA zaćvierdzili rašeńnie biełaruskaha suda. Azaranka — asnoŭny apiakun
Leninski sud horada Minska pryznaŭ Viktoryju Azaranka asnoŭnym apiekunom nad synam Lea. Kalifarnijski sud paćvierdziŭ, što heta rašeńnie maje siłu i na terytoryi ZŠA.
Jak paviedamiła sport.tut.by znajomaja ź situacyjaj krynica, biełaruski sud razhledzieŭ usie sprečnyja pytańni pa spravie ab apiecy nad synam Viktoryi Azaranki i Bili Mak-kieha jašče da pieradačy jaho ŭ amierykanski sud. U tym liku byli razhledžany pytańni pa miescy žycharstva dziciaci i paradku ŭdziełu ŭ vychavańni niepaŭnaletniaha abodvuch baćkoŭ.
Rašeńni byli pryniatyja na karyść dziciaci z ulikam intaresaŭ Azaranka i Makkieha. Leninski sud horada Minska pryznaŭ Viktoryju Azaranka asnoŭnym apiekunom (dzicia pavinna pastajanna znachodzicca z maci i moža bačycca z baćkam u paradku, vyznačanym sudom).
Asnoŭnym miescam žycharstva Lea nazvanaja Respublika Biełaruś.
Pradstaŭniki Bili Makkieha sprabavali abskardzić hetaje rašeńnie ŭ Minskim haradskim sudzie, ale apielacyjnaja skarha była adchilenaja. Uletku 2017 hoda Makkieh źviarnuŭsia ŭ amierykanski sud z prośbaj nie ŭličvać rašeńnie, pryniataje na terytoryi Biełarusi, i samastojna razhledzieć pytańni, jakija tyčacca miesca žycharstva i vyznačeńnia paradku ŭdziełu baćkoŭ u vychavańni niepaŭnaletniaha dziciaci. Paśla vyvučeńnia spravy kalifarnijski sudździa paćvierdziŭ, što jana mahła być razhledžana na terytoryi Respubliki Biełaruś i maje zakonnuju siłu. Na padaču apielacyi ŭ baćki dziciaci jość try tydni.
Nahadajem, u lipieni sud Łos-Andželesa pastanaviŭ, što na čas razhladu spravy ab apiakunstvie Lea nie moža pakidać horad. Kab nie rasstavacca z synam, uvieś hety čas Viktoryja taksama zastavałasia na terytoryi ZŠA.
Z-za sudovaj ciažby tenisistka prapuściła niekalki bujnych turniraŭ, u tym liku Australian Open, US Open, a taksama turniry ŭ Cyncynaci i novaziełandskim Oklendzie. Pravy Viktoryi ŭ amierykanskim sudzie adstojvajuć izrailski advakat Ziv Valner i amierykanski juryst Łora Vasier.
Kamientary