U Minsku siamiejnuju paru aryštavali za palityku, doma zastałosia ich 6-hadovaje dzicia

5 červienia ŭ dvary svajho doma była zatrymanaja minčanka Alena Łazarčyk. Jak stała viadoma TUT.BY ad rodnych, napiaredadni jaje zaprašali ŭ Kastryčnicki RUUS, dzie byli źviestki, što žančyna brała ŭdzieł u niesankcyjanavanym mierapryjemstvie na Kamaroŭcy. Alena admoviłasia źjavicca ŭ milicyju biez pozvy, u vyniku jaje zatrymali. Dniom raniej, paviedamlajuć pravaabaroncy, zatrymali jaje muža, doma zastałosia ich 6-hadovaje dzicia.

Pravaabaronca Alaksiej Łojka raspavioŭ, što rodnyja navat nie adrazu mahli daviedacca, kudy źnikła Alena Łazarčyk i jaje muž Siarhiej Mackojć. U Savieckim, Kastryčnickim RUUS i Centry izalacyi pravaparušalnikaŭ (CIP) admaŭlalisia paviedamlać infarmacyju. Paźniej u CIP usio ž paćvierdzili, što Łazarčyk i Mackojć znachodziacca tut. Adnak ni rodnyja, ni pravaabaroncy pa-raniejšamu nie mohuć vyśvietlić, Alenu i Siarhieja ŭtrymlivajuć u izalatary da suda abo sud užo pryniaŭ rašeńnie ab pakarańni ŭ vyhladzie administracyjnaha aryštu.

Pravaabaroncy ličać, što ŭ dziejańniach supracoŭnikaŭ milicyi jość prykmiety pieravyšeńnia słužbovych paŭnamoctvaŭ: č.2 art. 6.7 KaAP zabaraniaje aryštoŭvać žančyn i adzinokich mužčyn, jakija majuć niepaŭnaletnich dziaciej, synu Aleny i Siarhieja šeść hadoŭ.

Jak stała viadoma TUT.BY, chłopčyk znachodzicca z rodnymi, jakija surjozna zaniepakojenyja situacyjaj. Pry pošukach Aleny i pravaabaroncy, i blizkija paviedamlali ŭ Centr izalacyi pravaparušalnikaŭ, što doma zastaŭsia jaje niepaŭnahadovy syn.

6 červienia pravaabaronca Alaksiej Łojka patelefanavaŭ pa telefonie davieru HUUS Mienharvykankama. Padpałkoŭnik milicyi Andrej Dziemidčuk adkazaŭ, što pa hetym fakcie treba źviarnucca ź piśmovaj zajavaj u MUS, prakuraturu ci ŭ Śledčy kamitet, jany i daduć adkaz.

U pres-słužbie minskaj milicyi TUT.BY paviedamili, što ŭ dačynieńni da Łazarčyk byŭ składzieny administracyjny pratakoł (parušeńnie paradku arhanizacyi abo praviadzieńnia masavych mierapryjemstvaŭ — art. 23. 34 KaAP), jaki ŭ nastupnym byŭ pieradadzieny ŭ sud. 5 červienia sud pastanaviŭ pryciahnuć Alenu Łazarčyk da adkaznaści ŭ vyhladzie administracyjnaha aryštu na 12 sutak. Siarhiej Mackojć pa rašeńni suda taksama adpraŭleny «na sutki».

Vychodzić, što pad aryštam Łazarčyk i Mackojć znachodziacca pa rašeńni suda. Ci paviedamlali jany sudździ, što doma ŭ ich zastałosia 6-hadovaje dzicia, nieviadoma, jak i toje, čamu sud pryniaŭ rašeńnie pakarać baćkoŭ aryštam. Na sudzie nie było ni rodnych, ni advakataŭ, ni pravaabaroncaŭ.

• 0
• 0
• 0
• 0
• 0
• 0
• 0
• 0