U apieratyŭna-dziažurnuju słužbu Leninskaha RAUS z zajavaj źviarnuŭsia 88-hadovy žychar horada, jaki raspavioŭ, što nieviadomy čałaviek na praciahu lipienia vynosiŭ majomaść ź jaho haraža, raźmieščanaha ŭ adnym z błokaŭ pa vulicy Krupskaj, paviedamlaje abłasnaja milicyja.
Piensijanier pieraličyŭ vykradzienaje za hety čas: ruchavik z karobkaj pieradač, kamplekty kołaŭ, bampier ad aŭtamabila, mietaličnyja varoty. Ahulnaja suma naniesienaj škody skłała bolš za 1870 rubloŭ, paviedamlaje UUS Mahiloŭskaha abłvykankama.
Supracoŭniki adździeła kryminalnaha vyšuku Leninskaha RAUS pa padazreńni ŭ datyčnaści da nazvanych padziej zatrymali 52-hadovaha žychara horada, jaki nahledzieŭ čužy haraž dla asabistych patreb.
Jon zrezaŭ dva naviasnyja zamki i pasialiŭsia ŭsiaredzinie nie prynaležnaha jamu pamiaškańnia. Paśla, aśmialeŭšy, mužčyna staŭ zaprašać tudy svaich pryjacielaŭ, ź jakimi jany razam i raśpivali śpirtnyja napoi, i zastalisia načavać. Kali praz tydzień złačynnaha praviadzieńnia času ŭładalnik haraža tak i nie źjaviŭsia, złamyśnik staŭ raspradavać čužuju majomaść, a paśla naceliŭsia na aŭtamabil, jaki stajaŭ tam ža. Adnak jon paśpieŭ tolki źniać z mašyny ruchavik — šakavany ŭładalnik haraža ŭsio ž taki pryjšoŭ i vyjaviŭ, u što pieratvaryłasia prynaležnaje jamu pamiaškańnie. Jon adrazu ž vyklikaŭ pravaachoŭnikaŭ. Udałosia vyśvietlić, što ŭ płanach u haražnaha «zachopnika» byŭ navat jaho prodaž — na hetaj ździełcy jon taksama płanavaŭ zarabić hrošy, jakija paśla vydatkavaŭ by na śpirtnyja napoi.
Kamientary