«Raskładaju hrošy pa kanviertach». Jak biełarus vypracavaŭ cełuju sistemu nakapleńniaŭ

Siarhiej (imia źmieniena) žyvie z žonkaj, dziaciej pakul niama. Pieršyja sproby kiravać finansami jon pradprymaŭ jašče ŭ 2016 hodzie, a ŭ 2019-m ŭziaŭsia za spravu napoŭnicu. 

Zarobak u Siarhiej vysoki — 2500 dalaraŭ, bo mužčyna pracuje ŭ IT-śfiery. Ale adsutnaść takoha zarobku — nie pieraškoda nakapleńniam, ličyć jon. Mužčyna zhadvaje, što adkładaŭ i tady, kali na pałovie staŭki zarablaŭ 175 rubloŭ, prytym što ŭ toj čas jašče i atrymlivaŭ płatnuju adukacyju i samastojna jaje apłočvaŭ. Dapamahała toje, što Siarhiej žyŭ z baćkami i zbolšaha jany apłočvali kamunałku i ježu, tamu možna było adkładać pa 100 rubloŭ štomiesiac na navučańnie. Tady ž mužčyna braŭsia za roznyja dadatkovyja zarobki, što taksama papaŭniali jaho biudžet.

Ź ciaham času Siarhiej vypracavaŭ cełuju sistemu nakapleńniaŭ. Pieravahu addaje najaŭnym hrošam, bo ich vielmi zručna raskłaści pa kanviertach, kožny ź jakich ujaŭlaje saboj niejki metavy fond. Ale nie curajecca i kartak — zvyčajna papaŭniaje ich, kali treba apłacić kamunalnyja pasłuhi. Usie svaje tranzakcyi jon fiksuje praz prahramu «Biudžiet OK» dla iOS.

Asnova dla inviestycyj u mužčyny vyhladaje tak:

«Ëść umoŭna «niedatykalny» kanviert, tudy raniej išło bolš za ŭsio hrošaj — 50-60% pracentaŭ zarpłaty. Spačatku ŭsio było dobra, i tam naźbirałasia značnaja suma, jakaja potym pajšła na nabyćcio aŭtamabila. Ale paśla hetaha nabytku stratehija vyjaviłasia nieefiektyŭnaj, bo na bujnyja traty pa ramoncie davodziłasia zalazać u hety kanviert.

Vyrašyŭ, što budu kłaści tudy mieniej, ale i vymać adtul hrošy bolš nie budu».

Tamu Siarhiej pierajšoŭ na inšuju stratehiju.

Pa 10% jon adkładaje ŭ terminovy i dapamožny fondy — z terminovaha hrošy biarucca na vydatki nakštałt raptoŭnaha ramontu, dapamožny vykarystoŭvajecca ŭ tym vypadku, kali spatrebilisia vydatki na adnu z dalejšych katehoryj, ale hrošy ŭ joj užo skončylisia.

9% adkładajucca na płaciažy pa rasterminoŭcy i inšych formach pazyki (naprykład, u svajakoŭ), 8% — na leki i inšyja miedycynskija vydatki, naprykład, vizity da doktara, jašče pa 8% idzie na vydatki na mašynu (bienzin i absłuhoŭvańnie) i na ježu.

4% zarobku mužčyna tracić na apłatu kamunałki, internetu i mabilnaj suviazi, jašče pa 4% nakiroŭvaje na doŭhaterminovyja fondy: vialikija pakupki (technika ci niešta padobnaje), padarožžy, padarunki, śviatkavańni (dni naradžeńnia, Novy hod i hetak dalej) i padziei — «kulturny adpačynak», pachod u restaran ci ŭ teatr, chacia apošnim časam nie vypadaje hetaha rabić.

I heta jašče nie ŭsio. 2% zarobku Siarhiej vydatkuje na hramadski transpart dla svajakoŭ biez paśviedčańnia kiroŭcy na vypadak, kali ŭ jaho nie stykujecca raskład i jon nie moža sam ich zabrać, i jašče 2% — na apłatu padpiski prahram dla smartfona i kampjutara nakštałt Spotify.

Usio, što zastajecca paśla hetaha, Siarhiej addaje ŭ «niedatykalny» fond, tudy ž nakiroŭvaje paśla atrymańnia zarobku ŭsio, što zastałosia ź minułaha miesiaca ŭ dapamožnym i terminovym fondach.

«Minus — hiedanizmu heta nie vielmi spryjaje, ale zatoje, jak zahadzia zapłanavać viečarynu ź siabrami, to možna dazvolić na joj sapraŭdy karaleŭski razmach, dobra viedajučy, što ŭ ciabie jość vyłučanyja mienavita na heta hrošy i možna nie turbavacca, što paśla daviadziecca dumać, na što kuplać ježu ci spłačvać daŭhi», — dzielicca Siarhiej.

Pavialičyć

Marycie pra pavyšany zarobak i ličycie, što heta vyrašyć usie vašy finansavyja prablemy? Siarhiej upeŭnieny, što heta nie tak:

«Vydatki zaŭsiody adaptujucca pad prybytki. Lubomu padvyšeńniu zarobku ŭ mianie adrazu znachodziłasia prymianieńnie, nie kažučy pra niespakojnuju dynamiku cenaŭ apošnim časam. Tamu raźličvać na toje, što pavyšeńnie zarpłaty adrazu vyrašyć usie finansavyja prablemy, nie varta.

Ja raniej z zajzdraściu hladzieŭ na ludziej z maim ciapierašnim uzroŭniem zarpłaty i dumaŭ, što im niama pra što turbavacca. Ciapier, stykujučy toje i sioje i razumiejučy, jak hrošaj nie chapaje na ŭsie nieabchodnyja vydatki, a jašče ž jość i ambicyi, staŭlusia da hetaha spakajniej. Tamu lepiej pryvučacca raźmiarkoŭvać hrošy adrazu».

Jašče adzin łajfchak ad Siarhieja — mužčyna namahajecca ŭsie hrošy, što atrymlivaje, adrazu pieravieści ŭ dalary. Pa-pieršaje, heta histaryčna bolš stabilnaja valuta, čym biełaruskija rubli, a pa-druhoje, dalary mienš likvidnyja i tamu abaraniajuć Siarhieja ad spantannych pakupak i zamovy ježy, kali lanota hatavać.

Ale jość u takoj zvyčki i minus: «U vypadkach, kali treba niešta terminova kupić ci zapłacić, dla mianie heta niaprosta. Ale nie nastolki krytyčna, kab admaŭlacca ad hetaj stratehii».

Čytajcie taksama:

«Adpraviła hrošy z adnoj karty na inšuju, a jany pajšli nieviadoma kamu». Ci možna ich viarnuć?

Kryptavaluta dapamahaje abychodzić bankaŭskija sankcyi i inšyja abmiežavańni. Schiema prostaja

Biełarusy sabrali hrošy na padarunki 128 dzieciam palitviaźniaŭ. Asabliva dziakujuć Šrajbmanu

• 25
• 0
• 3
• 17
• 3
• 2
• 7
• 0