Były viazień raspavioŭ pra miedyčnuju dapamohu ŭ kałonii, dzie za vosiem miesiacaŭ pamierli dva palitviaźni

Kałonijaj ciapier kiruje 47-hadovy Filip Sturčanka — prykładna z traŭnia 2023 hoda jon zamianiŭ Alaksieja Staravojtava. Były palitviazień Ihar (imia źmienienaje ŭ metach biaśpieki), jaki ŭ viciebskaj kałonii prabyŭ bolš za dva hady i niadaŭna vyzvaliŭsia, raspavioŭ «Viaśnie» pra miedyčnuju dapamohu i padrabiaznaści śmierci Mikałaja Klimoviča.

Čerhi na 20-30 źniavolenych

Ihar raspaviadaje, što časta pa miedyčnuju dapamohu ŭ kałonii źviartacca jamu nie davodziłasia.

«Navat kali ŭ mianie była tempieratura, ja razumieŭ, što pachod u miedčastku moža ničym nie skončycca. Pakul pastaiš u čarzie ŭ maleńkim pryłaźniku, dzie mohuć znachodzicca adnačasova 20-30 źniavolenych, to možaš, akramia prastudy, nachapać jašče ŭsialakich inšych chvarob».

Były palitviazień adznačaje, što «možaš stajać i nie dačakacca, mohuć zakryć pryjomnaje i syści». Uspaminaje Ihar i taki vypadak. Pry hetym, jon źviartaje ŭvahu, što sami źniavolenyja stvarali takuju reputacyju:

«Pałova ź ich prychodziła tudy, kab atrymać daviedku i nie iści na pramzonu».

Płomba na tydzień

Adnak pra ŭzrovień takoha absłuhoŭvańnia ŭ kałonii možna sudzić u tym liku pa historyi byłoha źniavolenaha kałonii № 3 pra stamatałohiju:

«Jak tolki ja pryjechaŭ ź SIZA, u mianie była vialikaja dzirka ŭ zubie — jaje treba było terminova zahaić, tamu što tudy traplała ježa i pačynała baleć. Adnak ja nie moh patrapić da stamatołaha na praciahu paŭhoda, tamu što jaho prosta nie było. Nichto nie chacieŭ iści na pracu ŭ kałoniju. Kali jon narešcie źjaviŭsia, ja adrazu ž zapisaŭsia da jaho, ale pryniali mianie tolki praz tydzień. Płomby, jakuju mnie pastavili, chapiła prykładna na miesiac. Praź miesiac ja vyrašyŭ usio ž znoŭ pajści, kab zahaić tuju dzirku. Stamatołah mnie jašče bolš praśvidravaŭ jaje, i novaja płomba vyvaliłasia ŭžo praz tydzień».

Da vyzvaleńnia Ihar chadziŭ ź vialikaj dzirkaj u zubie, tamu što bajaŭsia, što stamatołah jašče bolš rasśvidruje zub, i tady nie budzie šancaŭ na jaho adnaŭleńnie na voli.

Atrymańnie miedbanderoli ŭ kałonii — kvest

Były palitviazień taksama raspaviadaje, što ŭ kałonii atrymać patrebnyja leki i vitaminy vielmi składana:

«Kali niejkich miedykamientaŭ niama ŭ miedčastcy, to, viadoma, možna paprasić svajakoŭ pieradać. Adnak dla hetaha treba prajści doŭhi kvest. Tamu što adrazu pišaš zajavu na načalnika kałonii z prośbaj dać dazvoł svajakam pieradać mnie miedyčnuju banderol u peŭnym składzie, pieraličvajučy kankretnyja miedykamienty. Potym hetuju zajavu padajuć načalniku miedčastki, jaki pavinien padpisać jaje i tym samym dać dazvoł. Paśla hetaha ź miedčastki tabie prynosiać błank. Ty jaho pavinien zapoŭnić i addać nazad. U bolšaści vypadkaŭ niejkaje źviano (štości z zajaŭ) hublajecca. Tamu časta hetaja pracedura zaciahvajecca na miesiac, a to i na dva».

Na čas źniavoleńnia Ihara ŭ kałonii prypała pandemija karonavirusu. Jon uzhadvaje, jak heta było:

«U kałonii arhanizavali izalavanyja pakoi dla chvorych na COVID-19. Pry hetym usio roŭna byli takija aficery, jakija chadzili biez masak, heta značyć mahli, hruba kažučy, prynieści z voli novyja infiekcyi».

Śmierci ŭ kałonii

Pa słovach Ihara, za bolš čym za dva hady jaho źniavoleńnia ŭ kałonii pamierła kala vaśmi-dzieviaci źniavolenych. Chtości pamiraŭ ad staraści, a chtości navat ad spynieńnia serca:

«Paraŭnalna niadaŭna ŭ kałonii pamior źniavoleny hadoŭ 55. Jon chadziŭ pastajanna na stadyjon i zajmaŭsia sportam. Pad ranicu jon pačaŭ chrypieć i pamior. U jaho spyniłasia serca. I kab niechta prychodziŭ ź miedčastki — ja nie čuŭ. Supracoŭniki pryjšli niepasredna paśla padjomu. Jany ačapili cieła, kantralory stajali i achoŭvali, kab nichto nie padychodziŭ. Paśla śmierci źniavolenych u kałoniju pa cieły pryjazdžaje «tabletka» zialonaha koleru. Što heta za bryhada — ja biez paniatku».

Były palitviazień uspaminaje, što chutkija pryjazdžali ŭ kałoniju dosyć časta — kali była nieabchodnaja źniavolenym terminovaja miedyčnaja dapamoha abo na vychodnych, kali niama dziažurnaha lekara.

Padrabiaznaści śmierci Mikałaja Klimoviča

5 traŭnia 2023 hoda va ŭzroście 61 hoda ŭ viciebskaj kałonii pamior błohier i hramadski aktyvist ź Pinska Mikałaj Klimovič. Infarmacyi pra abstaviny jaho śmierci praktyčna niama da hetaha času. Były palitviazień raspavioŭ usio, što viadoma:

«Ale treba razumieć, što infarmacyja da nas dachodziła ŭ vielmi abrezanaj kolkaści. Usie naviny my atrymlivali z radyjo «Zek»: pa čutkach, jakija chadzili pamiž atradami. Usiu infarmacyju my atrymlivali takim šlacham i pravieryć jaje praŭdzivaść było niemahčyma.

My čuli, što pamior palityčny, jaki navat nie paśpieŭ padniacca ŭ kałoniju. Pa čutkach, jakija dachodzili da nas, jon navat nie paśpieŭ padniacca na «karancin». Kazali, što jon siabie drenna adčuvaŭ padčas etapu. Kali jon tolki pryjechaŭ z etapu [ź Bieraściejskaha SIZA ŭ Viciebskuju kałoniju jaho vieźli praz usiu Biełaruś], jaho pieradali kałonii, jamu stała drenna, vyklikali chutkuju i jon pamior. Pavodle papiaredniaj infarmacyi, jon pamior u mašynie chutkaj dapamohi. Heta ŭsia infarmacyja, jakaja dajšła da nas. Tamu što administracyja kałonii vielmi kłapocicca, kab infarmacyja z voli nie prachodziła, i naadvarot. Adbyvajecca błakavańnie infarmacyi ŭ adzin i druhi bok».

Ihar adznačaje, što etap patrabuje ad źniavolenaha šmat enierhii i sił:

«Jedzieš u nakuranym vahonie… Kali čałaviek nie palić i maje prablemy z dychańniem, to heta moža vielmi mocna adbicca. Taksama byvajuć pierahružanyja kupe, što dadatkova vielmi ŭpłyvaje na etap i stan źniavolenych pry hetym. Dy i sama atmaśfiera mocna nie spryjaje dobramu stanu zdaroŭja».

Čytajcie taksama:

«Niama ničoha bolš istotnaha za žyćcio čałavieka. I apraŭdać zabojstvy niemahčyma». Cichanoŭskaja vystupiła z nahody śmierci Vadzima Chraśko 

Chto toj sudździa, jaki adpraviŭ u kałoniju Vadzima Chraśko — palitviaźnia ź ciažkaj chvarobaj, jakaja stała śmiarotnaj

Sudziać ajcišnika z EPAM — mierkavana, za danaty

• 0
• 0
• 1
• 1
• 0
• 5
• 9
• 0