U Litvie znoŭ prapanavali zakryć jašče dva pamiežnyja punkty na miažy ź Biełaruśsiu

Litoŭskaja Kamisija pa nacyjanalnaj biaśpiecy prapanuje spynić ruch tavaraŭ, transpartu i ludziej praz pamiežnyja punkty propusku Łavaryški («Katłoŭka» na biełaruskim baku) i Rajhard («Pryvałka» la Hrodna), paviedamlaje LRT.

Taksama «ŭličvajučy ryzyki, źviazanyja z tranzitnymi patokami praź Litvu ź Biełarusi i dziejnaściu biełaruskich śpiecsłužbaŭ suprać litoŭskaj dziaržavy», kamisija ŭ aŭtorak prapanuje pastupova skaracić kolkaść dazvołaŭ, jakija vydajucca biełaruskim i litoŭskim pieravozčykam, jakija ažyćciaŭlajuć rehularnyja pieravozki, mižnarodnyja pasažyrskija pieravozki aŭtobusami.

Jašče adna prapanova — abmiežavać pasadku i vysadku pasažyraŭ na čyhunačnym pamiežnym punkcie Kiana (ciahniki Minsk — Vilnia ŭžo amal čatyry hady jak nie kursujuć — NN), spynić ruch piešachodaŭ i viełasipiedystaŭ praź dziaržaŭnuju miažu pamiž Biełaruśsiu i Litvoj. Anałahičnaja prapanova datyčycca i čyhunačnaj stancyi Kibartaj (Čarnyšeŭskaje), što na miažy Litvy z Kalininhradskaj vobłaściu Rasii.

«Za apošni čas patok biełaruskich hramadzian pavialičyŭsia prykładna na 50% na ŭsich punktach propusku, raźmieščanych uzdoŭž miažy ź biełaruskimi darohami. Pakolki patoki transpartu, tavaraŭ i ludziej pavialičvajucca, nieabchodna aptymizavać praces kiravańnia hetymi patokami i bolš detalova praviarać ludziej, transpartnyja srodki i tavary», — ličyć kiraŭnik Nacyjanalnaha centra kryzisnaha ŭpraŭleńnia Viłmantas Vitkaŭskas.

Rašeńnie ab zakryćci pahraničnych punktaŭ pavinien pryniać urad Litvy.

U vypadku pryniaćcia rašeńniaŭ skarociacca transpartnyja i pasažyrapatoki, jakija prachodziać praź Litvu, a taksama źniziacca mahčymaści dziejnaści biełaruskich i rasijskich śpiecsłužbaŭ i słužbaŭ biaśpieki suprać Litvy, miarkuje aficyjnaja Vilnia.

Čakajecca taksama, što budzie bolš efiektyŭna praduchilacca ŭvoz sankcyjnych tavaraŭ u Biełaruś i Rasiju, bolš efiektyŭna budzie ažyćciaŭlacca prafiłaktyka i praduchileńnie kantrabandy, bolš efiektyŭna budzie achoŭvacca źniešniaja miaža Šenhienskaj zony.

Letaś na aŭtamabilnych pamiežnych punktach propusku praź dziaržaŭnuju miažu ź Biełaruśsiu asob pravieryli 3,9 miljona razoŭ — na 25,5% bolš, čym u 2022 hodzie. 66% siarod pravieranych asob byli hramadzianami Biełarusi.

Hramadzianie Litvy pierasiekli miažu 684 tysiač razoŭ — na 13,4% mienš, čym u 2022 hodzie, kolkaść unikalnych asob letaś dasiahnuła amal 62 tysiač i źniziłasia na 17,5%.

U žniŭni minułaha hoda Litva zakryła dva z šaści punktaŭ propusku na miažy ź Biełaruśsiu — «Šumsk» («Łoša» ź biełaruskaha boku) i «Ćvierač» («Vidzy»).

Ministr unutranych spraŭ Ahnie Biłatajte tady zajaviła, što ministerstva prapanuje zakryć jašče dva — «Łavaryški» i «Rajhard», adnak pytańnie było adkładziena. Kali ich zakryjuć, to zastanucca pahranpierachody: «Miedniki» («Kamienny Łoh») i «Salečniki» («Bieniakoni»).

• 12
• 0
• 1
• 6
• 4