«Surjozna schudnieŭ, važyć, napeŭna, kiłahram 80». Były palitviazień pra Viktara Babaryku
Były palitviazień navapołackaj kałonii raskazaŭ «Lusterku», što čuŭ pra viadomych źniavolenych.
Ź viadomych palitviaźniaŭ u PK-1 znachodziacca eks-pretendent u kandydaty ŭ prezidenty Viktar Babaryka, žurnalist Ihar Łosik, miedyjamieniedžar Andrej Alaksandraŭ, žurnalist i siabra «Sajuza palakaŭ Biełarusi» Andrej Pačobut. U lutym 2024 tudy pieraviali ŭdzielnika hurta Tor Band Dźmitryja Hałavača. Apošniaha Alaksiej (jon byŭ u kałonii ź viasny 2023-ha i da kanca taho hoda) užo nie zastaŭ, ale amal z usimi astatnimi tak ci inakš pierasiakaŭsia.
«Dźmitryča (Viktara Babaryki. — zaŭv. red.) ja bačyŭ zdaloku paru razoŭ, kali byŭ na karantynie. Jaho tady adpraŭlali ŭ sančastku, heta rabili zvyčajna pozna ŭviečary, paśla pravierki, — raspaviadaje były palitviazień. —
Jon surjozna schudnieŭ. Ja bačyŭ jaho ŭ 2020-m, i roźnica vielmi prykmietnaja, važyć, napeŭna, kiłahram 80, a to i mienš. Chłopcy kažuć, što jon pasivieŭ, vielmi mocna pastareŭ, vyhladaje niadobra.
Kali Dźmitryč hod tamu trapiŭ u balnicu, chadzili čutki, što byli złamanyja rebry i adno ź ich prabiła lohkaje. Nibyta stuknuŭsia, kali ŭpaŭ. Ale mnie ŭ heta vierycca słaba. Tak, kali ŭpaści z druhoha paviercha, možna, napeŭna, złamać rebry, ale heta ž jak treba stracić kancentracyju».
Ihar Łosik naminalna ličyŭsia ŭ atradzie Alaksieja. Ale mužčyna asabista jaho nie bačyŭ, žurnalist uvieś čas znachodzicca ŭ ŠIZA abo PKT. Kaža, što źniavolenyja ź jaho atrada nazyvajuć Łosika «mocnym čałaviekam».
«Jon małajčyna, što trymajecca, tamu što ŠIZA vymotvaje, — raspaviadaje surazmoŭca. — Jašče ja pasiabravaŭ z Andrejem Alaksandravym.
A na pramzonie pierasiakaŭsia z Andrejem Pačobutam, jon staičnamu da ŭsiaho stavicca. Trymaŭsia, usio razumieŭ. Da jaho i jašče adnaho hramadzianina Polščy, jaki tam utrymlivajecca, pryjazdžaŭ konsuł, ale naŭprost kazaŭ, što ničoha zrabić jany nie mohuć».
Hoły mužčyna pierabieh z Polščy ŭ Biełaruś, ruch na miažy na paru hadzin pierakryvali9
Kamientary