Paśla zabojstva dziaciej u anhlijskim Saŭtparcie ŭspychnuli biesparadki, 39 palicejskich paranienyja
U paniadziełak padčas napadu na tancavalny hurtok, pryśviečany vyvučeńniu tvorčaści Tejłar Śvift, zarezali troch dziaŭčynak, niekalki dziaciej byli paranienyja.
U brytanskim horadzie Saŭtpart kala Livierpuła, dzie ŭ paniadziełak u dziciačym tancavalnym kłubie byli zarezanyja try dziaŭčynki i paranienyja jašče niekalki dziaciej, na nastupny dzień uspychnuli biesparadki z antyisłamskaj padaplokaj, piša Bi-bi-si.
Trahiedyja zdaryłasia, kali pravodziŭsia zaniatki, pryśviečany vyvučeńniu tvorčaści Tejłar Śvift.
Niekalki socień mužčyn, jak miarkujecca brytanskich radykalnych nacyjanalistaŭ, pačali zakidvać kamianiami, butelkami i inšymi pradmietami miascovuju miačeć i palicejskich, jakija sprabavali pieraškodzić im, a zatym padpalili mikraaŭtobus palicyi i śmiećcievyja kantejniery.
Miascovaja słužba chutkaj dapamohi ciaham pieršaj hadziny nočy abviaściła, što traŭmy atrymali 22 palicejskija i 11 ź ich adpraŭlenyja ŭ balnicu, a praz paŭtary hadziny paviedamiła, što paranienyja ŭžo 39 palicejskich, ź ich 27 dastaŭleny ŭ balnicu, astatnim dapamoha akazana na miescy. Sama miascovaja palicyja ŭdakładniła, što surjoznyja traŭmy — pierałomy, parezy i kantuzii — atrymali dzieviać jaje supracoŭnikaŭ.
Akramia taho, paciarpieli try palicejskija sabaki: u dvuch — traŭmy łap ad kinutych cahlin, u adnaho — apioki. Udzielnikaŭ biesparadkaŭ siarod pacyjentaŭ chutkaj dapamohi nie akazałasia.
Palicyja ŭ svaich zajavach usialak paźbiahaje zhadki isłamu i musulman, ale z zajavy rehijanalnaj isłamskaj arhanizacyi i ahulnaha kantekstu jasna, što biesparadki zładzili ludzi, jakija vyrašyli, byccam junak, aryštavany pa abvinavačvańni ŭ zabojstvach u dziciačym kłubie — musulmanin i radykalny isłamist.
Jany pryjšli da takoj vysnovy na padstavie paviedamleńniaŭ, jakija raźlacielisia ŭ sacsietkach. Palicyja zapeŭnivaje, što vieryć hetym paviedamleńniam nielha.
«Vakoł statusu 17-hadovaha junaka, jaki ciapier znachodzicca pad vartaj u palicyi, było šmat śpiekulacyj i zdahadak, i niekatoryja ludzi vykarystoŭvajuć hetuju akaličnaść, kab zładzić biesparadki na našych vulicach. My ŭžo zajavili, što aryštavany naradziŭsia ŭ Vialikabrytanii, i śpiekulacyi ciapier nikomu nie dapamahajuć», — zajaviŭ pamočnik hałoŭnaha kanstebla Aleks Hos.
Aryštavany junak, pavodle źviestak palicyi, naradziŭsia ŭ stalicy Uelsa Kardyfie, a žyŭ u vioscy Benks pobač z Saŭtpartam.
Biesparadki ŭspychnuli nieŭzabavie paśla žałobnaj cyrymonii, na jakuju sabralisia žychary Saŭporta.
Palicyja Miersisajda — rehijonu z centram u Livierpule — miarkuje, što hetuju cyrymoniju jak nahodu sabracca i napaści na miačeć vykarystoŭvali radykalnyja nacyjanalisty ź liku prychilnikaŭ antyisłamskaj Lihi abarony Anhlii (English Defence League, EDL).
Były lidar EDL Tomi Robinsan, jaki žyvie ŭ emihracyi, zajaviŭ u svaim telehram-kanale, što hetaja arhanizacyja ŭžo dziesiać hadoŭ jak nie isnuje.
Arhanizacyja «Sietka miačeciaŭ rehijonu Livierpuł» zajaviła, što miascovaja musulmanskaja abščyna nie maje nijakaha dačynieńnia da zabojstva dziaciej u Saŭtparcie.
«Nievialikaja mienšaść sprabuje pakazać spravu tak, byccam heta biesčałaviečnaje dziejańnie niejak źviazana z musulmanskaj supołkaj. Nie, nie źviazana», — havorycca ŭ zajavie abjadnańnia miačeciaŭ.
«Sietka miačeciaŭ rehijonu Livierpuł» zajaŭlaje, što šakavanaja zabojstvam u Saŭtparcie i zaklikaje «nie sastupać tym, chto choča raźjadnać nas i pasiejać nianaviść».
Biesparadki rezka asudzili premjer-ministr Brytanii Kir Starmier i ministr unutranych spraŭ Iviet Kupier.
Saŭtpart (Southport) — prymorski kurortny horad u 27 km na poŭnač ad Livierpuła. U im žyvuć kala 94,5 tysiačy čałaviek i tolki krychu bolš za tysiaču ź ich — musulmanie.
Tejłar Śvift paśla incydentu ad ruki napisała i raźmiaściła ŭ sacsietkach pranikniony post, a jaje fanaty za sutki sabrali paŭtary sotni tysiač funtaŭ dapamohi siemjam zahinułych i paciarpiełych.
Kamientary